AZAL самолёти ҳалокати бўйича якуний ҳисобот йил охиригача эълон қилинади

ICAO талабларига кўра, авиаҳалокат терговига бир йил вақт ажратилади.

Фото: Anadolu Agency via Getty Images

Халқаро фуқаро авиацияси ташкилоти (ICAO) талаблари, стандартлари ва тавсия этилган амалиётига кўра, авиаҳалокатлар терговига бир йил вақт ажратилади. Бу ҳақда Қозоғистон транспорт вазири ўринбосари Талгат Ластаев маълум қилди.

«Шунга кўра, AZAL самолётининг Оқтов яқинидаги ҳалокати бўйича якуний ҳисобот шу йилнинг декабрига қадар тайёр бўлиши керак», деди у.

Унинг сўзларига кўра, ICAO бош котиби ва президенти авария бўйича дастлабки ҳисобот сифатини юқори баҳолаган.

«Авиациядаги стандартлар ва қоидаларни тартибга солувчи асосий ташкилот ICAO ҳисобланади. ICAO бош котиби ва президенти Қозоғистон томонидан эълон қилинган дастлабки ҳисобот даражаси ва сифатини юқори баҳолаб, фактларнинг аниқ тақдим этилиши, маълумотларнинг батафсил ва тўлиқлигини таъкидладилар», деб қўшимча қилди вазир ўринбосари.

Azerbaijan Airlines (AZAL) авиакомпаниясининг Бокудан Грознийга учган Embraer 190 самолёти 2024 йил 25 декабрь куни Қозоғистоннинг Оқтов шаҳри яқинида ҳалокатга учради. Оқибатда 38 киши ҳалок бўлиб, 29 киши тирик қолди.