Олий Рада иккинчи уринишда Зеленскийнинг легитимлигини тан олувчи резолюцияни қабул қилди

Украина Олий Радаси иккинчи уринишда президентлик сайлови уруш тугагандан кейин ўтказилиши ва янги сайловгача Владимир Зеленский қонуний давлат раҳбари бўлиб қолиши ҳақидаги ҳужжат қабул қилди.

Фото: Global Look Press

Депутат Ярослав Железняк маълум қилганидек, 268 депутатдан иборат парламент 226 овоз билан «Украина Олий Радасининг Россия агрессияси шароитида Украинада демократияни қўллаб-қувватлаш тўғрисидаги баёноти»ни қабул қилди. Бир кун олдин ҳужжатни қабул қилиш учун 8 та овоз етмай қолган эди.

Украина президенти девони раҳбари маслаҳатчиси Михайло Подоляк сўзларига кўра, кўплаб депутатлар Россия босқини бошланишининг уч йиллигига бағишланган турли йиғилишлар ва тадбирларда иштирок этгани учун овоз бериш жараёнида қатнашмаган. «Резолюция қабул қилинишига шубҳам йўқ», деган эди Подоляк. Депутат Ирина Герашченко сўзларига кўра, 24 февралдаги йиғилишда 450 нафар депутатдан атиги 244 нафари иштирок этган.

Рада баёнотида Украинада демократик сайлов ўтказишнинг иложи йўқлиги учун жавобгарлик Владимир Путин зиммасида экани ва сайлов Украина ҳудудида «ҳар томонлама, адолатли ва барқарор тинчлик таъминланганидан кейин» ўтказилиши таъкидланган. Рада, шунингдек, Зеленскийнинг ваколатлари шубҳа остида эмаслигини ва янги сайланган президент ўз лавозимига киришгунга қадар амалда бўлишини тасдиқлади.

Владимир Зеленский 2019 йил май ойида Украина президенти бўлди. Қонунга кўра, унинг ваколат муддати 2024 йил май ойида тугаши керак эди, бироқ уруш сайловни ўтказишга тўсқинлик қилди.