Трамп ва Зеленский тортишуви: ўзбек тилида тўлиқ версия
|22:11 / 02.03.202523 76211 мин
Украинадаги урушни якунлаш бўйича тинчлик музокараларида яна бир муҳим бурилиш нуқтаси рўй берди. АҚШ президенти Доналд Трамп ва Украина президенти Володимир Зеленский ўртасидаги музокаралар муваффақиятсизликка учради. Kun.uz президентларнинг Оқ уйдаги учрашув вақтида рўй берган тортишуви акс этган қисмини ўзбек тилида тақдим этади.
АҚШ президенти Доналд Трамп ва Украина президенти Володимир Зеленский ўртасида Оқ уйда ўтказилган музокаралар муваффақиятсиз якунланди. ОАВ вакиллари кўз ўнгидаги учрашув давомида томонлар баҳслашиб кетди.
Асосий баҳслашув залдаги журналистлардан бирининг Трамп Путин билан ҳаддан ташқари яқинлашиб кетаётганидан хавотир ҳақидаги саволи билан бошланди.
Трамп: Агар мен иккиси билан ҳам муносабатларни сақлаб қолмаганимда, келишув бўлмасди. Сиз Путин ҳақида даҳшатли гаплар айтиб, кейин эса: «Салом, Владимир, келишувимиз қандай кетяпти?» дейишимни хоҳлаяпсизми? Бу иш бермайди. Мен Путин билан иттифоқчи эмасман... Мен ҳаммага яхши бўлиши учун тинчлик билан иттифоқдаман.
Путинга нафратини кўряпсизми? Бундай нафрат билан битим тузиш жуда қийин... Қаттиққўл бўлишимни хоҳлайсизми? Мен сиз кўрган ҳар қандай одамдан кўра қаттиққўлроқ бўлишим мумкин, лекин бундай йўл билан келишувга эриша олмайсиз. Яхши, яна бир савол...
Вэнс: Тўрт йил давомида АҚШда Путин ҳақида қаттиқ гапирган президент бор эди, кейин эса Путин Украинага бостириб кирди ва мамлакатни вайрон қилди. Биз Жо Байденнинг йўлини синаб кўрдик, унинг сўзлари унинг ҳаракатларидан кўра кўпроқ аҳамиятга эгалигини кўрсатдик. Американи буюк мамлакатга айлантирадиган нарса шундаки, Америка дипломатия билан шуғулланади. Президент Трамп шундай қилмоқда.
Зеленский: Сиздан бир нарса сўрасам майлими? У бизнинг ҳудудларни, Украинанинг катта қисмини, шарқни ва Қримни ишғол этди. У бу ҳудудларни 2014 йилда эгаллаб олганди.
Аввал президент Обама даври, кейин президент Трамп, кейин президент Байден, энди яна президент Трамп. Худо хоҳласа, энди президент Трамп уни тўхтатади. Аммо 2014 йилда уни ҳеч ким тўхтатмаганди. У шунчаки ишғол этган ва ўзиники қилганди. У одамларни ўлдирган, тушуняпсизми?
Трамп: 2015 йилдами? Ўшанда мен йўқ эдим.
Мавзуга оид
Зеленский
: Ҳа, аммо 2014 йилдан 2022 йилгача ҳам вазият ҳозиргидек эди. Одамлар ҳалок бўларди, уни ҳеч ким тўхтатмасди. У билан музокаралар бўлган. 2019 йилда у билан келишув имзолаганман. У билан, Макрон ва Меркел билан ўт очишни тўхтатиш бўйича келишув имзоладим... Аммо кейин у сулҳни бузди, одамларимизни ўлдирди ва асирлар алмашуви ўтказмади. Шундай экан сиз, Жей Ди қандай дипломатия ҳақида гапиряпсиз?
Вэнс: Мен мамлакатингиз вайрон бўлишига чек қўядиган дипломатия ҳақида гапиряпман.
(Вэнс ва Зеленский амалда бир вақтда гапира бошлайди ва бир-бирининг сўзини бўлиб қўяди)
Вэнс: Жаноб президент, Овал кабинетга келиб, Америка нашрлари қаршисида буни муҳокама қилиш ҳурматсизлик деб ўйлайман. Сизда кадрлар билан боғлиқ муаммолар бор. Ушбу можарога чек қўйишга ҳаракат қилгани учун президентга миннатдорчилик билдириш керак.
Зеленский: Сиз ҳеч Украинада бўлганмисиз? Бизда қандай муаммолар борлигини айтяпсиз. Бир марта келинг.
Вэнс: Мен аслида бу репортажларни кўрганман, уларни пропаганда турига олиб борасиз. Сиз армиянгизга одамларни жалб қилишда муаммоларга дуч келганингизга қўшилмайсизми? Овал кабинетга келиб, ёрдам беришга уринаётган маъмуриятга ҳужумга ўтишни ҳурматга лойиқ деб ўйлайсизми?
Трамп: Бизга нимани ҳис қилишни уқтирманг. Биз муаммони ҳал қилишга ҳаракат қиляпмиз. Сиз буни уқтирадиган ҳолатда эмассиз. Буни ёдда тутинг.
(Зеленский ва Трамп амалда бир вақтда гапира бошлайди ва бир-бирининг сўзини бўлиб қўяди)
Зеленский: Мен уқтираётганим йўқ, мен саволга жавоб беряпман…
Трамп: Сиз биз нимани ҳис қилишимизни уқтирадиган ҳолатда эмассиз... Биз ўзимизни жуда яхши ҳис қиламиз…
Зеленский: Сиз таъсирини ҳис қиласиз…
Трамп: Ҳозир аҳволингиз унчалик яхши эмас. Сиз ўзингизни жуда ёмон аҳволга солиб қўйдингиз ва у ҳақ. Сиз бундан яхши ҳолатда эмассиз. Сизда ҳозир кузирлар йўқ. Биз билан кузирларингиз пайдо бўлади.
Зеленский: Мен карта ўйнамаяпман. Ҳеч қанақа кузир… ҳеч қанақа кузир, жаноб президент. Мен мутлақо жиддийман…
Трамп: Ҳозир миллионлаб одамлар ҳаёти билан ўйнашяпсиз. Учинчи жаҳон уруши билан ўйнашяпсиз. Бу ҳурматсизлик. Биз сизни кўпчилик айтганидан ҳам кўпроқ қўллаб-қувватладик.
Зеленский: Мен мамлакатингизни чуқур ҳурмат қиламан.
Вэнс: Бирор марта раҳмат айтдингизми?
Зеленский: Кўп марта.
Вэнс: Сиз Пенсилванияга бориб, октябр ойида мухолифат учун ташвиқот олиб боргандингиз. Қўшма Штатлар ва мамлакатингизни қутқаришга ҳаракат қилаётган президентга миннатдорчилик билдиринг.
Зеленский: Агар уруш ҳақида жуда баланд овозда гапирсангиз…
Трамп: У баланд овозда гапирмаяпти. Йўқ, йўқ. Сиз кўп гапирдингиз. Мамлакатингиз оғир аҳволда.
Зеленский: Биламан. Биламан.
Трамп: Сиз ғалаба қозонолмайсиз. Биз туфайли ғалаба қозониш учун жуда яхши имкониятга эгасиз.
(Зеленский ва Трамп энди синхрон гаплаша бошлайди)
Зеленский: Биз қоламиз, ўз мамлакатимизда қоламиз, кучли бўлиб қоламиз. Урушнинг бошиданоқ биз ёлғиз эдик. Ва биз миннатдормиз. Мен бу кабинетда раҳмат айтдим...
Трамп: Сиз ёлғиз эмасдингиз. Биз сизга — бу аҳмоқ президент орқали — 350 млрд доллар бердик… Сизга ҳарбий техника бердик… Сизлар жасур одамларсиз, лекин улар бизнинг ҳарбий техникамиздан фойдаланишга мажбур эди... Агар бизнинг ҳарбий техникалар бўлмаганида, уруш икки ҳафтада тугарди.
Зеленский: «Уч кундан кейин» — мен буни Путиндан эшитганман, уч кундан кейин…
Трамп: Сизга айтсам, бу йўл билан иш юритиш жуда қийин бўлади.
Вэнс: Шунчаки раҳмат айтинг.
Зеленский: Мен Америка халқига кўп марта айтганман…
Вэнс: Келишмовчиликлар борлигини тан олинг ва ноҳақ бўлганингизда Америка нашрларида муносабатларни ойдинлаштиришга уриниш ўрнига, келинг, бу келишмовчиликларни ҳал қилайлик. Биламизки, сиз ноҳақсиз.
Трамп: Америка халқи нима бўлаётганини кўриши фойдали. Менимча, бу жуда муҳим, шунинг учун мен буни узоқ вақт қўллаб-қувватладим. Сиз миннатдор бўлишингиз керак...
Зеленский: Мен миннатдорман…
(Зеленский ва Трамп яна деярли бир вақтда гапиришга ўтади)
Трамп: Сизда кузирлар йўқ, халқингиз қирилмоқда, аскарларингиз тугамоқда... Кейин сиз бизга шундай дейсиз (Трамп Зеленскийга тақлид қилишга ўтади): «Мен ўт очишни тўхтатишни хоҳламайман. Мен кетишни истайман ва шуни хоҳлайман». Агар ўт очишни тўхтатишга эришганингизда, мен сизга шундай деган бўлардим: қабул қилинг, токи ўқлар учиши ва одамларингиз ҳалок бўлиши тўхтасин.
Зеленский: Албатта, албатта, биз урушни тўхтатишни истаймиз.
Трамп: Мен ўт очишни тўхтатмоқчиман. Чунки тинчлик битимидан кўра ўт очишни тўхтатишга тезроқ эришилади.
Зеленский: Кафолатлар билан.
Трамп: Бу мен билан бўлмаган. Бу Байден исмли йигит билан бўлган, у унчалик ақлли одам эмасди. Бу сизларга чойшаб берган Обама билан бўлган, мен эса танкларни йўқ қилишингиз учун Javelin ракеталарини берганман. Обама сизга чойшаб берган.
Сиз аслида кўпроқ миннатдор бўлишингиз керак, чунки мен сизга айтсам, қўлингизда кузирлар йўқ. Биз билан эса кузирларингиз бўлади.
Журналист: Россия сулҳни бузса-чи? Агар Россия бу музокараларни бузса-чи? Унда нима қиламиз?
Вэнс: У «Россия сулҳни бузса нима бўлади?» деяпти.
Улар келишувни буздими? Улар Байден даврида келишувни бузишган, чунки улар Байденни ҳурмат қилмаган. Улар Обамани ҳурмат қилмади. Мени ҳурмат қилишади.
Путин мен билан кўп нарсаларни бошдан кечирди. У жодугарлар овини бошдан кечирган. Сиз бу битим ҳақида ҳеч эшитганмисиз? Ҳантер Байден, Жо Байден, Ҳиллари Клинтон, айёр Адам Шифф билан можаро. Бу демократларнинг фирибгарлиги эди.
Буларнинг барчасида уни айблашган. Барчаси Ҳантер Байденнинг ётоқхонасидан бошланган. Бу жирканч эди!
Кейин эса улар: «О, о, бу дўзахий ноутбукни Россиядан ташлаб кетишган», дейишди. ФҚБнинг 51 агенти бу ёлғонни қўллаб-қувватлади. Барчаси ёлғон эди.
У Обама ва Буш билан келишувларни бузган, эҳтимол Байден билан ҳам. Лекин мен билан келишувларни бузмади. У битим тузишни истайди.
Мен сизга зўр йигит бўлиш имконини бердим. Қўшма Штатларсиз зўр йигит бўла олмасдингиз. Ва албатта, сизнинг одамларингиз ҳам жуда довюрак.
Зеленский: Раҳмат.
Трамп: Аммо сиз ёки битим тузасиз, ёки биз чиқамиз. Агар биз чиқсак, сиз жанг қиласиз. Бу сизга ёқади деб ўйламайман, лекин сиз жанг қилишга мажбур бўласиз.
Сизларда кузир йўқ. Лекин бу битимни имзоласак, позициянгиз анча яхши бўлади. Аммо ўзингизни мутлақо миннатдор эмасдек тутяпсиз ва бу яхши эмас.
Хўп, менимча, биз етарлича кўрдик, нима деб ўйлайсиз? Бу телевидениеда зўр кўрилади, мен сизга айтсам. Майли, буни яна кўриб чиқамиз.
Можародан кейин икки президентнинг ёпиқ музокаралари бекор қилинди, Зеленский Оқ уйни муддатидан олдин тарк этишга мажбур бўлди, фойдали қазилмалар бўйича келишув ҳам имзоланмай қолди. Учрашувдан кейин Трамп ижтимоий тармоқдаги саҳифасида пост қолдириб, яна бир бор Зеленскийни ҳурматсизликда айблади ва постини шундай сўзлар билан якунлади: «У тинчликка тайёр бўлганида, қайтиши мумкин».
