«Россиянинг навбатдаги манипуляциялари». Зеленский Путиннинг ўт очишни тўхтатиш таклифига берган жавобини изоҳлади

Владимир Путиннинг фронтда ўт очишни 30 кунга тўхтатиш борасидаги таклифга муносабати «кутилган» ва «жуда манипулятив». Бу ҳақда Украина президенти Володимир Зеленский Россия—Украина урушининг 1114-куни якунларига бағишланган мурожаатида маълум қилди.

«Ҳозир биз Россиядан фронтда жанговар ҳаракатларни тўхтатиш ғоясига Путиннинг кутилган ва манипулятив гапларини тингладик — у ҳақиқатда рад жавобини тайёрламоқда. Путин, албатта, президент Трампга урушни давом эттиришни, украиналикларни ўлдиришни хоҳлашини тўғридан-тўғри айтишга қўрқади. Шу сабабли Москвадагилар сукунат ғоясига шундай шартлар қўймоқдаки, токи умуман ҳеч нарса амалга ошмасин ёки иложи борича узоқ чўзилсин. Путин кўпинча шундай қилади — тўғридан-тўғри «йўқ» демайди, лекин ҳамма нарсани чўзиб, нормал ечимларни деярли имконсизга айлантиради» — дейди Зеленский.

Унинг сўзларига кўра, Украинадагилар «буларнинг барчасини — Россиянинг навбатдаги манипуляциялари» деб ҳисобламоқда.

Зеленский АҚШ сулҳ режимига риоя этилишини назорат қилиш ва тасдиқлашни ташкил этишга тайёр бўлганини айтди. Путин эса бу масалалар сулҳ келишувига эришишдан олдин муҳокама қилиниши кераклигини таъкидлади. Украина президентининг фикрича, бундай назоратни «Америка ва Европа имкониятлари» ёрдамида амалда таъминлаш мумкин.

«Биз бирор нимани мураккаблаштирадиган шартлар қўймаяпмиз. Буни Россия қилмоқда. Доим таъкидлаб келганимиздек, ҳамма нарсани чўзадиган ва мантиқсиз ёндашадиган ягона томон — бу Россия. Уларга уруш керак», — дея қўшимча қилади Зеленский. У Путинга «босим» ўтказишга, жумладан, Россияга қарши санкциялар жорий этишга чақирди.

АҚШ Саудия Арабистонида Украина делегацияси билан ўтказилган музокараларда 30 кунга ўт очишни тўхтатиш таклифини илгари сурган эди. Украина томони бунга рози бўлди.

Владимир Путин сулҳ тўғрисидаги ғояга изоҳ бераркан, Россия Украинада ўт очишни тўхтатиш таклифига рози бўлган, бироқ у узоқ муддатли тинчликка олиб келган тақдирдагина. Сулҳ ҳақидаги таклиф бир қанча нюансларни ҳисобга олиши керак, деган президент. Хусусан, унинг сўзларига кўра, Киев 30 кунлик ўт очишни тўхтатиш режимидан қурол олиш ёки куч сафарбар этиш учун фойдаланиши хавфи бор.

Ғарб нашрларининг манбаларига кўра, Путин Москва учун максимал даражада фойдали шартларга эришиш учун сулҳ тузилишини чўзишни бошлайди.