ЖАР элчиси АҚШда персона нон грата деб эълон қилинди

АҚШ давлат котиби Марко Рубио Жанубий Африканинг АҚШдаги элчиси Иброҳим Расулни персона нон грата деб эълон қилди. «Жанубий Африканинг АҚШдаги элчисини энди буюк мамлакатимизда кутиб олишмайди. Иброҳим Расул Американи ёмон кўради ва Америка Қўшма Штатлари президентини ёмон кўради, у ирқчилик мавзусига берилиб кетган сиёсатчи. У билан муҳокама қиладиган ҳеч нарсамиз йўқ, шунинг учун у персона нон грата саналади», — деб ёзди Рубио 14 март, жума куни Х ижтимоий тармоғидаги саҳифасида.

У постга Breibart нашри маълумотга ҳавола қўйган, унда Расул Йоханнесбургдаги Mapungubwe институти тадбирида нутқ сўзлаб, Трампни «оқ танлилар етакчилиги глобал ҳаракати» етакчиси деб атаган. Ҳавола берилган видеода дипломат АҚШнинг амалдаги президенти тарафдорларининг MAGA (Make America Great Again)ҳаракати «нафақат устунлик инстинкти», балки мамлакатдаги демографик силжиш натижаси бўлганини, «натижада АҚШ электорати 48 фоиз оқ танли бўлиши тахмин қилинаётганини» тушунтиради.

Трамп ЖАРга молиявий ёрдам беришни тўхтатди

Доналд Трамп 7 март куни АҚШ Жанубий Африкада 2024 йил охирида қабул қилинган қишлоқ хўжалиги ерларини экспроприация қилиш тўғрисидаги қонун туфайли уни федерал молиялаштиришни бутунлай тўхтатишини маълум қилди. Ушбу қоида ҳукуматга фермерларнинг ерларини айрим ҳолларда эгасидан «нол компенсация» билан тортиб олиш имконини беради. Шу билан бирга, расмийлар ерни топшириш учун ҳар қандай ҳолатда ҳам эгасининг розилиги талаб қилинишини таъкидламоқда, мухолифатдаги «Демократик алянс» партияси эса қонун мамлакат конституциясини бузади ва апартеид ҳукумати қўллаган чораларни эслатади, деб ҳисоблайди. Ҳозирда Жанубий Африкадаги экин майдонларининг деярли 75 фоизи оқ танли озчилик вакилларига тегишли.

«Жанубий Африка узоқ йилдан бери мамлакатда яшовчи деҳқонларга нисбатан даҳшатли ишларни қилмоқда. Уларнинг ерлари ва фермер хўжаликлари мусодара қилинмоқда. Ҳозир у ер яшашга яроқсиз ва биз барча федерал маблағларни тўхтатмоқдамиз», деб ёзган эди Трамп ўша пайтда Truth Social'да. Бундан ташқари, у мамлакатни тарк этишга қарор қилган жанубий африкалик фермерлар учун Америка фуқаролигини олиш жараёни соддалаштирилишини айтди.