Саакашвили яна 4,5 йиллик қамоқ жазосини олди

Тбилиси суди Гуржистоннинг собиқ президенти Михаил Саакашвилини чегарани ноқонуний кесиб ўтганликда айблаб, 4 йилу 6 ойга озодликдан маҳрум қилди. Mtavari TV хабарига кўра, ўтган ҳафта чиқарилган ҳукм билан бирга, судья собиқ президентни 12 йилу 6 ойга ҳукм қилган.

Гуржистонда жазони қўшиш принципи қўлланилади ва қамоқ муддати ҳибсга олинган пайтдан бошлаб ҳисобланади. Шундай қилиб, Саакашвили камида 2034 йил апрелигача панжара ортида қолади.

Саакашвили ҳозирги вақтда Тбилисидаги Viva Medi клиникасида даволанмоқда ва суд маҳкамасида иштирок этмади. Адвокатларнинг сўзларига кўра, судланувчи онлайн иштирок этиб, якуний сўз айтмоқчи бўлган, бироқ номаълум сабабларга кўра рад этилган.

Украина паспортини олгач, Гуржистон фуқаролигидан маҳрум қилинган Саакашвили 2021 йил октябрь ойида яширинча ватанига қайтди ва орадан кўп ўтмай ҳибсга олинган эди. Унга бир қанча жиноятлар, жумладан, чегарани ноқонуний кесиб ўтиш бўйича айблов қўйилди: Гуржистон прокуратураси хабар беришича, Саакашвили Украинадан Поти портига кемада етиб келган, уни юк машинаси ёрдамида сут маҳсулотлари солинган тиркама билан тарк этган ва шу тариқа Гуржистонга кирган.

12 март куни суд Саакашвилини катта миқдорда бюджет маблағларини ўзлаштиришда айбдор деб топиб, 9 йилга озодликдан маҳрум қилди. Тергов маълумотларига кўра, сиёсатчи бюджетдан 9 миллион ларини (тахминан 5 миллион доллар) шахсий эҳтиёжларига, яъни қимматбаҳо кийим-кечак сотиб олишга, машина ижарага олишга, ўғлининг ўқиши учун пул тўлашга ва ҳоказоларга сарфлаган. Гуржистонга қайтишдан олдин ҳам, 2018 йилда Саакашвили қотилликда айбланган полициячиларни афв этишда ваколатини суиистеъмол қилгани учун 6 йилга, депутат Валерий Гелашвилини калтаклагани учун эса 3 йилга сиртдан қамоқ жазосига ҳукм қилинган эди.

Саакашвилига қарши яна бир иш кўрилмоқда - 2007 йил 7 ноябрдаги мухолифат митингини тарқатиш бўйича.