Украинада ҳалок бўлгани тасдиқланган россиялик ҳарбийлар сони 100 мингга яқинлашди

Украинадаи урушда ҳалок бўлгани ҳужжатлар билан тасдиқланган россиялик ҳарбийлар сони 100 мингга яқинлашди. «Медиазона» ва кўнгиллилар жамоаси билан биргаликда очиқ манбалар орқали ўлим ҳолатлари ҳисобини юритаётган BBC рус хизмати ёзишича, 21 март ҳолатига кўра, журналистлар кенг кўламли босқин бошланганидан бери Украинада ҳалок бўлган 99 минг 113 нафар россиялик аскарнинг исмини аниқлаган.

Мутлақ рақамларда энг кўп қурбонлар Бошқирдистонга тўғри келади – 4468 киши. Нисбатан (минтақа аҳолисининг умумий сонини ҳисобга олган ҳолда) Тува аҳолиси энг кўп ҳалок бўлмоқда – уларнинг урушда ҳалок бўлиш эҳтимоли Москва аҳолисига қараганда 35 баравар юқори, деб ёзади нашр.

Аниқланган йўқотишларнинг ярмидан кўпи – уруш бошланган пайтда Мудофаа вазирлиги ёки Росгвардия билан ҳеч қандай алоқаси бўлмаган одамлардир.

Сўнгги ойларда ҳалок бўлганларнинг аксарияти – кўнгиллилардир. 2024 йил бошидан бери улар бошқа тоифаларга (сафарбар қилинганлар, маҳбуслар, шартнома бўйича) қараганда кўпроқ ҳалок бўлмоқда. Кенг кўламли босқин бошланганидан бери кўнгиллилар журналистлар томонидан аниқланган барча йўқотишларнинг деярли чорак қисмини (24 фоиз) ташкил этади.

Россиядаги регионлар кўнгиллилар оқимини ҳудуддаги ўртача иш ҳақига солиштирганда улкан миқдордаги бонуслар билан рағбатлантиради. Одатда шартномани имзолашда кўнгилли аскар федерал бюджетдан 400 минг рубл ва регионал бюджетдан камида шунча пул олади – аммо кўплаб регионлар кўнгиллиларни ёллаш режасини ошириб бажаришга ҳаракат қилиб, бу тўловларни бир неча баробар оширади. Хусусан, қишда Самара областида регион маъмурияти берадиган тўлов рекорд даражадаги 3,6 миллион рублга етганди (кейинчалик у 2,1 миллионга қисқартирилди).

BBC рус хизмати ва «Медиазона»нинг ҳалок бўлганлар ҳақидаги маълумотлари камайтириб кўрсатилган, чунки улар фақат очиқ манбаларда ҳужжатлар орқали тасдиқланган ўлим ҳолатларини ўз ичига олади. «Медуза» ва «Медиазона» урушнинг уч йиллигида ортиқча эркаклар ўлимини статистик баҳолаш орқали бундай ўлимлар сони 160-165 минг киши атрофида эканини аниқлаган.

Британия разведкаси маълумотларига кўра, 2022 йилда Украинага қарши уруш бошланганидан бери Россия армияси ҳалок бўлган ва яраланганлар билан бирга қарийб 900 минг кишини йўқотган бўлиши мумкин. Лондоннинг баҳолашича, ҳалок бўлган россиялик ҳарбий хизматчилар сони 200-250 мингни ташкил этади — бу Россия учун Иккинчи жаҳон урушидан бери энг катта йўқотишдир.