Ургутда гиёҳванд модда сотган мактаб директори 10 йилга қамалди 

Самарқанд вилоятининг Ургут туманида гиёҳванд модда савдоси билан шуғулланган мактаб директори ва унинг шериги жиноий жазога тортилди. Kun.uz суд ҳужжати билан танишди.

Суд ҳукмида келтирилишича, 1986 йилда туғилган Ф.Х. Ургут туманидаги 71-умумтаълим мактаби директори лавозимида ишлаган. У 2024 йил август ойи бошларида маҳалладоши Ш.А. билан кўп миқдордаги опий гиёҳванд моддасини Самарқанд вилояти ҳудудида сотиш бўйича жиноий тил бириктирган.

Жиноий режага мувофиқ Ш.А. терговда шахсини аниқлаш имкони бўлмаган шахсдан қарийб 1 кг опийни пулини сотганидан сўнг бериш шарти билан олган. Сўнгра шериклар 2024 йил 27 ноябр куни гиёҳванд моддани ҳуқуқни муҳофаза қилувчи орган ходимлари томонидан тезкор тадбирга жалб қилинган шартли ҳаридорга 12 минг АҚШ долларига сотмоқчи бўлган вақтда ушланган. Улардан бир дона қора рангли целлофан пакетга ўралган опий гиёҳванд моддаси ашёвий далил тариқасида олинган. Унинг оғирлиги 921,36 граммни ташкил қилган.

Ф.Х. судда айбига қисман иқрорлик билдирган ҳамда опийни туман Мактабгача ва мактаб таълими бўлимида ишловчи танишининг илтимосига асосан топиб берганлигини, бундан манфаатдор бўлмаганини айтган. Қилмишидан пушаймонлигини билдирган директор суддан енгиллик сўраган. 

Ш.А. ҳам айбига қисман иқрор бўлиб, Ф.Х. турмуш ўртоғини ишга қабул қилишини айтгани учун унинг илтимосига рози бўлиб, гиёҳванд модда топиб берганини маълум қилган. 

Суд ҳукми билан Ф.Х. ва Ш.А. Жиноят кодексининг 25,273-моддаси 5-қисмида (Гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) назарда тутилган жиноятни содир этганликда айбли деб топилган. Ф.Х.га 10 йил 2 ой, Ш.А.га 11 йил муддатга озодликдан маҳрум қилиш жазоси тайинланган.