28 июл куни бўлиб ўтган овоз беришда Жей Клейтон АҚШ Миллий разведкаси директори лавозимига расман тасдиқланди. Унинг номзодини президент Доналд Трамп июн ойида Сенатга тақдим этган эди.
AFP агентлиги маълум қилишича, дастлаб демократлар Клейтон номзодини Миллий разведка раҳбари вазифасини вақтинча бажарувчи Уильям Пултега нисбатан мақбулроқ вариант сифатида баҳолаган. Бироқ Сенатдаги эшитувлар давомида уларнинг муносабати ўзгарди.
Хусусан, демократ сенаторлар Клейтондан 2020 йилги президентлик сайловида Жо Байден ғолиб бўлганини тан оладими, деган саволни бир неча бор берган. Клейтон эса Байден сайлов ғолиби сифатида “эътироф этилгани“ни айтган, аммо тўғридан тўғри жавоб беришдан тийилган. Доналд Трамп эса бир неча йилдан буён ушбу сайлов натижалари сохталаштирилганини даъво қилиб келади, бироқ бу иддаоларни тасдиқловчи далиллар мавжуд эмас.
Жей Клейтон 2025 йилдан бери Ню-Йорк жанубий округи федерал прокурори сифатида фаолият юритиб келган. У бир қатор шов-шувли ишларга раҳбарлик қилган, жумладан, Венесуэланинг собиқ раҳбари Николас Мадурога нисбатан гиёҳвандлик моддалари ноқонуний айланмаси бўйича терговни ҳам назорат қилган.
Шунга қарамай, Клейтоннинг разведка ёки миллий хавфсизлик соҳасида амалий тажрибаси йўқ. Энди у АҚШнинг разведка ҳамжамиятини бошқаради. Ушбу тизим таркибига 18 та идора, жумладан, Марказий разведка бошқармаси (CIA), Миллий хавфсизлик агентлиги (NSA) ва Мудофаа вазирлиги разведка бошқармаси (DIA) киради.
Аввалги Миллий разведка директори Тулси Габбард май ойида турмуш ўртоғининг оғир касаллиги сабаб лавозимини тарк этган эди. Шундан сўнг Доналд Трамп вазифани вақтинча Уилям Пултега юклаган. Аммо унинг разведка соҳасида тажрибаси етарли эмаслиги икки партия вакиллари томонидан танқид қилинган.
AFP маълумотларига кўра, Пулте қисқа муддатли раҳбарлиги давомида Доналд Трампнинг айрим сиёсий рақибларига нисбатан жиноий таъқиб масаласини кўриб чиқиш учун материаллар юбориш ташаббуси билан чиққан ҳамда Миллий разведка директори аппаратида кенг кўламли қисқартиришларни амалга оширган. Унинг маълум қилишича, бешинчи босқич қисқартиришлардан кейин идора марказий аппарати ходимлари сони қарийб 30 фоизга камайтирилади.
Жей Клейтон илгари АҚШ Қимматли қоғозлар ва биржалар комиссияси (SEC) раиси сифатида ҳам ишлаган. Шунингдек, у Sullivan & Cromwell юридик фирмасида фаолият юритиб, ҳуқуқ соҳасида катта тажриба орттирган.
