«Бутун дунё ўйин тугади, деб ўйлаганди». «Реал»нинг ЕЧЛ плей-оффларидаги 5 та камбэки
|01:31 / 17.04.202519 35815 мин
«Арсенал»га қарши биринчи ўйиндаги йирик мағлубият — ҳали ҳаммаси тугади дегани эмасми?
Фото: Irina R. Hipolito/Getty ImagesФото: Irina R. Hipolito/Getty Images
Мадриднинг «Реал» клуби бир ҳафта олдин ЕЧЛ чоракфинали биринчи учрашувида «Арсенал»га йирик ҳисобда мағлуб бўлганди — 0:3. Жавоб ўйини 17 апрелга ўтар кечаси Испанияда ўтказилади: энди 1/2 финалга чиқиш учун Карло Анчелотти жамоасига уч ёки ундан кўп тўп фарқи билан ғалаба керак.
XXI асрда «Реал» ЕЧЛ плей-офф босқичларида биринчи ўйинларда мағлуб бўлганидан кейин беш марта кейинги босқичга ўтган. Лекин ҳозиргача биринчи учрашувдаги учта тўп фарқини йўққа чиқариш ушбу жамоага насиб этмаган. Қуйида мадридликларнинг яқин ўтмишдаги қаҳрамонликлари эсланади.
«Реал» Чемпионлар лигасининг 2000/2001 йиллар мавсумида турнирнинг амалдаги ғолиби сифатида қатнашган. Клуб биринчи гуруҳ босқичида «Байер», Лиссабоннинг «Спортинг» ва Москванинг «Спартак» клубларини ортда қолдирган. 1/8 финал вазифасини ўтаган иккинчи гуруҳ босқичида — «Лидс», «Андерлеҳт» ва «Лацио» билан квартетда биринчи бўлган. Чоракфиналда Висенте дель Боске шогирдларини УЕФА Кубогининг амалдаги ғолиби «Галатасарой» кутиб турарди.
Истанбулликлар ҳам турнирдаги иштирокини биринчи гуруҳ босқичида бошлаган, иккинчи гуруҳ босқичида «Милан» ва «ПСЖ» каби номдор жамоалардан устун келганди. Шу тариқа, чоракфиналда турклар ва испанлар икки асосий еврокубокнинг амалдаги ғолиблари сифатида тўқнашди.
«Галатасарой» ўшанда Европанинг энг кучли клубларидан бири сифатидаги мақомини тасдиқлайди. Истанбулдаги биринчи учрашувда Мирчи Луческу шогирдлари «Реал»ни ҳам мағлуб этади — 3:2. Меҳмонлар биринчи бўлим якунларига кўра икки тўп фарқи билан олдинда борганига қарамай, танаффусдан кейин «Галатасарой» меҳмонлар дарвозасини уч бор ишғол этади. Натижада истанбулликлар Мадридга яримфиналга чиқиш учун яхши имкониятга эга ҳолда йўл олишади.
Аммо «Реал» «Сантяго Бернабеу»да рақибни аямайди. Жамоа биринчи ўйиндаги хатодан сабоқ чиқарганди: биринчи бўлимнинг ўзида учта гол урилади, иккинчи бўлимда дарвоза дахлсизлиги сақлаб қолинади. Енгил камбэк ва яримфинал. Лекин 1/2 финалда «Реал»ни «Бавария» тўхтатганди. Мюнхенликлар икки ўйинда ҳам ғалаба қозонган (1:0, 2:1), кейин эса финалда «Валенсия» пеналтилар сериясида мағлуб этилган (1:1, 5:4).
Чемпионлар лигасининг кейинги мавсумида «Реал» «Бавария»дан реванш олади. «Реал» бу мавсумда биринчи гуруҳ босқичида «Рома», «Локомотив» ва «Андерлеҳт» каби клублар билан квартетда биринчи бўлади, иккинчи гуруҳ босқичида «Панатинаикос», «Спарта» Прага ва «Порту» клубларини ортда қолдиради. «Бавария» иккинчи гуруҳ босқичида «Манчестер Юнайтед» ортидан иккинчи блади. Қуръа чоракфиналда Висенте дел Боске ва Оттмар Ҳитцфелд жамоаларини яна учраштиради.
Мюнхендаги биринчи ўйинда «Бавария» ғалаба қозонади. Ҳолбуки ўйин охиригача «Реал» ҳисобда олдинда борганди: 11-дақиқада меҳмонлар яримҳимоячиси Жереми Нжитап ҳисобни очганди. Аммо 82- ва 88-дақиқаларда Штефан Эффенберг ва Клаудио Писсаро «Бавария»га ғалаба олиб келган голларни уради.
«Реал» устози дел Боске жавоб учрашувидан олдин шогирдлари камбэк қилишига ишончи комил эди. У жамоа қуроли «Хуанитонинг руҳи» бўлишини айтади — мадридликларнинг ўтган аср 80-йилларидаги афсонавий форварди «Бернабеу»да 90 дақиқа жуда кўп» ибораси билан машҳур бўлганди. Ва испанлар ушбу стадионда «Бавария» дарвозасига иккита жавобсиз гол йўллайди. Икки гол ҳам иккинчи бўлимда урилади: 69-дақиқада Иван Элгера Роберто Карлоснинг қанотдан узатмасидан кейин ҳисобни очади, 85-дақиқада худди шу каби ҳужумда Раулнинг пасидан кейин Гути якуний ҳисобни ўрнатади.
«Реал» яримфиналда ашаддий рақиби — «Барселона»ни йўлдан олади (2:0, 1:1). Соврин учун ўйинда эса мадридликлар «Байер»ни мағлуб этади — 2:1. Зинедин Зидан айнан ўша учрашувда Чемпионлар лигаси тарихидаги энг чиройли голни урганди. «Реал» эса тўққизинчи совринни қўлга киритганди.
«Реал» 2015/2016 йиллар мавсумини Рафаэл Бенитес раҳбарлигида бошлайди. Аммо ЕЧЛ плей-оффи бошланганида мадридликлар Зинедин Зидан бошқарувига ўтганди. 1/8 финалда испанлар «Рома» билан икки ўйинда ҳам 2:0 ҳисобларида ғалаба қозонади. Чоракфинал учун қуръада ҳам «Реал»нинг омади келади – у қадар кучли бўлмаган «Волфсбург» рақиб бўлади.
Бироқ, биринчи учрашувдан сўнг, Мадриддагилар немисларга дуч келишганидан афсусланишади. «Вольфсбург» ўз уйида «Реал»дан устун келади – 2:0. Ваҳоланки, бир неча кун олдин Зидан жамоаси ички чемпионатда сафарда «Барселона» устидан ғалаба қозонганди (2:1). Ўшанда кўпчилик мадридликлар бор кучини класикода қолдиргани ҳақида гапиради.
Жавоб ўйини олдидан Зидан жамоани ғалаба учун илҳомлантиради: «Олдимизда жуда муҳим ўйин бор, аммо совуққонлик билан ўйнашимиз керак. Биз рақибга фақат 10-15 дақиқа босим қилиб, бу қарама-қаршиликда устун келолмаймиз. Агар рақиб гол уриб олса, янада қийинроқ бўлади. Шунинг учун илк дақиқаданоқ диққатни жамлаш керак. Биз гол уришимиз керак ва бунинг учун бир ярим соат вақтимиз бўлади. Хотиржамликни сақлаш керак».
Бироқ, «Реал» таркибида бундай сўзларсиз ҳам майдонни ёндириб ташлашга тайёр бўлган футболчи бор эди — Криштиану Роналду. «Сантяго Бернабеу»да португалиялик юлдуз ҳет-трик қайд этиб, мадридликларни кейинги босқичга олиб чиқади. Ўша учрашув Зиданнинг шим йиртилиб кетиши билан ҳам ёдда қолган: француз мураббий вазиятлардан бирига ҳаддан ташқари ҳиссий муносабатда бўлганди.
«Футболда қийналиб бўлса ҳам ғалаба қозониш яхшироқ. Бу клуб учун байрам ва биз барибир юришда давом эта олганимиздан ҳамма хурсанд. Осон ғалабалар бўлмайди. Биринчи ўйиндаги мағлубиятдан сўнг характер кўрсатиб, охиригача курашдик. Мен жамоамдаги барча ўйинчилар билан фахрланаман. Роналду — ўзига хос футболчи. Унинг ҳаракатлари ҳал қилувчи характерга эга эди. Ҳет-трик қайд этиб, Криштиану ўзининг хизмати керак бўлган паллада клубга ёрдам берди», – дейди ўйиндан кейин Зидан.
Ўша ғалабадан кейин «Реал» яримфиналда қийинчилик билан «Манчестер Сити» тўсиғидан ўтади (0:0, 1:0). Финалда эса уч йил ичида иккинчи бор «Атлетико» билан тўқнашади. «Қироллик клуби» яна ғалаба қозонади, бу сафар иш пеналтилар сериясида ҳал қилинади (1:1, 5:3 ).
2021/2022 йиллар мавсуми старти олдидан Карло Анчелотти Мадридга қайтади. Клуб хўжайини Флорентино Перес унинг олдига Чемпионлар лигасида ғолиб чиқиш вазифасини қўяди. Бу вақтга келиб «Реал» асосий еврокубокка 2018 йилдан буён эга чиқмаганди.
Гуруҳ босқичида мадридликлар беш ўйинда ғалаба қозониб, фақат Молдованинг «Шериф» клубига сенсацион тарзда мағлуб бўлади (1:2), меҳмонларнинг ўйинда ҳисобни очувчи голига ўзбекистонлик Жасурбек Яхшибоев муалифлик қилганди. 1/8 финалда эса «Реал»ни «ПСЖ»га қарши икки ўйин кутаётганди. Мадридликларга ўз гуруҳидан иккинчи ўрин билан чиққан клублар орасидаги энг кучлиси рақиб бўлганди. Мбаппе, Месси ва Неймардан иборат супертриони жамлаган парижликлар ўзининг илк еврокубогини қўлга киритишни мақсад қилганди. Килиан билан боғлиқ тарих қўшимча интрига ҳосил қилади: ОАВда ушбу форвард «Реал»га ўтиши кенг муҳокама қилина бошлаганди.
Ва айнан Мбаппе Париждаги учрашувда ягоналигини сақлаб қолган гол муаллифи бўлади. «Реал» учун янада аламлиси, у голни 90+4-дақиқада урганди. Шундай қилиб, «ПСЖ» Испанияга кичик устунлик билан йўл олади.
Жавоб ўйинида яна французлар биринчи бўлиб гол уришади — ва яна Мбаппе! 39-дақиқада у Тибо Куртуани хато қилишга мажбур қилиб, «Реал» дарвозасининг яқин бурчагини нишонга олади. Аммо иккинчи бўлимда мезбонлар ҳужумчиси Карим Бензема ҳет-трик қайд этиб, «Олтин тўп» учун дастлабки қадамни ташлайди.
«Биз жуда оғир ўйинда ғалаба қозондик, айниқса, Мбаппенинг голидан кейин, жуда қийин ўйин. «Реал» машғулотларда бўлгани каби юқори прессинг қилишга ҳаракат қилди ва шу тариқа биринчи гол урилди. Мухлислар бизни олдинга бошлашди ва биз тобора кўпроқ вазиятлар яратдик», – дейди ўйиндан кейин Анчелотти.
Ўша ўйиндаги қаҳрамонликдан кейин Бензема «Олтин тўп» учун асосий даъвогарга айланди. Чоракфиналда «Реал» яна бир топ рақиб — ЕЧЛнинг ўша вақтдаги ғолиби «Челси» билан тўқнаш келади. Лондондаги илк ўйинда испанлар 3:1 ҳисобида ғалаба қозонади (Карим яна ҳет-трик қайд этди), Мадридда эса қўшимча бўлимларда мағлуб бўлди — 2:3. Аммо Бенземанинг биринчи экстра-таймдаги голи эвазига «Реал» яримфиналга йўл олади.
Биринчи ўйин: 3:4
Иккинчи ўйин: 3:1 (қўшимча вақт)
Чемпионлар лигаси 2021/2022 йиллар мавсуми 1/2 финалида «Манчестер Сити»га қарши ўйинлар «финалдан олдинги финал» мақомини олади. Сўнгги йилларни жуда кучли ўтказган Хосеп Гвардиола жамоаси ўз тарихидаги биричи ЕЧЛ ғолиблигини орзу қилаётганди. Ундан олдинги мавсумда «шаҳарликлар» финалгача етиб борган, аммо «Челси»га ютқазганди (0:1). Шу йилларнинг энг кучли икки жамоасининг ўзаро ўйинларидан мухлислар катта нарса кутишарди.
«Этиҳад»даги биринчи учрашув мухлислар кутганидан ҳам яхшироқ бўлди. «Манчестер Сити» устунлик қилди, тўртта гол урди, аммо... «Реал» бир ўйинда 2,5 имконият яратгани ҳолда рақиб дарвозасини 3 бор ишғол қилди. Энг муҳим голни 82-дақиқада Карим Бензема пеналтидан киритиб, ҳисобни 3:4 кўринишига келтирди. Мадридликлар сафарда мағлубиятга учради, аммо финалга чиқиш имкониятини сақлаб қолди.
«Биринчи ўйин биз учун яхши натижа билан якунланмади. Тўртта гол ўтказиб юбордик, яхши ҳимояланмадик. Бу натижа қарама-қаршилик натижасини ҳал қилиши мумкин. «Манчестер Сити» — кучли рақиб, бугун улар буни кўрсатишди. Салбий томони — тўртта гол ўтказиб юборганимиз, ижобий томони — учта гол урганимиз», – дея қайд этди Анчелотти ўйиндан кейин.
«ПСЖ» ва «Челси» билан кўрсатган қаҳрамонликларидан кейин мадридликлардан «Манчестер Сити»га қарши жавоб ўйинида ҳам камбэк кутилади. Гвардиола эса бўлажак ўйин ҳақида ниманидир олдиндан ҳис қилгандек гапиради: «Балки биринчи ўйиндагига қараганда яхшироқ ўйнашимиз керакдир, аммо ёмонроқ ўйнашимиз ва барибир ғалаба қозонишимиз мумкин. Баъзан ҳақингни оласан, баъзан эса йўқ. Биз ниҳоятда сифатли футбол кўрсатиб, ғалаба қозонишимиз керак».
Аммо жавоб ўйини инглизлар учун яхши кечди. 73-дақиқада «Манчестер Сити» вингери Риёз Маҳрез гол урди. Икки ўйин натижасига кўра умумий ҳисоб инглизлар фойдасига 5:3 кўринишини олади. Аммо Родриго «Реал»нинг қўлидаги навбатдаги жокер бўлиб чиқди. Бразилиялик футболчи иккинчи бўлим ўрталарида майдонга тушди ва ўйин охирида мадридликларни қутқариб қолди. У 90-дақиқада Бенземанинг узатмасидан кейин тўпни Эдерсон дарвозасига тўғирлаб юборади. Кейинги ҳужумда эса ўнг қанотдан узатилган тўпни дарвозага жойлаб, дубл қайд этади. «Сантяго Бернабеу» ақлдан озишни бошлайди.
Овертаймларда эса «Реал» рақибни таслим этади: 95-дақиқадаёқ Бензема пеналтини аниқ ижро этади. Мадридликлар яна мўъжизавий камбэк қайд этиб, Чемпионлар лигаси финалига чиқади.
«Ғалати воқеа юз берди. Биз жуда кучли жамоалар билан ўйнадик, улар мавсум бошида Чемпионлар Лигасида ғалаба қозонишига ишонган жамоалар эди. «ПСЖ», «Челси», «Манчестер Сити...» Футболчиларга тан бериш керак. Улар борини беришди. Бутун дунё ўйин тугади деб ўйлаганди. Аммо биз яхши комбинациялар уюштирдик, Родриго эса голлар урди. Биз бор кучимизни сарфладик», – деди ўйиндан кейин мадридликлар устози.
Парижда кечган финалда яна «Реал»нинг омади келади. «Ливерпул» бутун ўйин давомида мадридликларга босим уюштиради ва Куртуани таҳлика остида ушлаб туради (зарбалар бўйича 23:4). Испанларга эса навбатдаги марта ЕЧЛ ғолиби бўлиш учун ўйин давомида дарвоза соҳасига тўғри борган биргина зарба (1:9) кифоя қилади. 59-дақиқада Винисиус Федерико Валверденинг узатмасини голга айлантиради ва мадридликларга Чемпионлар лигасидаги 14-совринни келтиради.
Энди эса ЕЧЛнинг 2024/2025 йиллар мавсуми яримфиналига чиқиш учун «Реал» XXI асрда ўзининг энг катта камбэкини амалга ошириши талаб этилади. Аммо мадридликлар «Сантяго Бернабеу»да вақти-вақти билан мўъжизалар рўй беришига ўргатиб қўйган.
