АҚШда терроризмда гумонланиб ҳибсга олинганлар сони 655 фоизга ошди

АҚШ ҳукумати 20 январдан бери ўтказилган оммавий рейдлар давомида терроризмда гумонланган 219 кишини ҳибсга олди. Бу ўтган йилнинг мос даврига нисбатан 655 фоизга кўп, деб хабар беради The New York Post.

Ички хавфсиз вазирлиги вакилининг маълум қилишича, Ҳиндистон фуқароси Харприт Сингх ҳам ҳибсга олинган. У АҚШ чегарасини 2022 йил 27 январда Мексика орқали ноқонуний кесиб ўтган ва суд жараёнлари санаси белгиланганидан кейин чегарачилар томонидан қўйиб юборилган.

Таъкидланишича, Харприт Сингх Ҳиндистонда молиявий терроризм, ёллаш ва гранатадан фойдаланган ҳолда полиция участкасига ҳужум ташкиллаштиришда айбланмоқда ҳамда қидирувга берилган. Шунингдек, у Панжобда собиқ полициячини ўлдириш ва қўрқитиш мақсадида унинг уйига ҳужум ҳам қилган.

Ички хавфсизлик вазири ёрдамчиси Триш Маклафлиннинг қайд этилишича, собиқ президент Жо Байден маъмурияти Сингхнинг озодликка чиқарилишида айбдор.

Аввалроқ АҚШ президенти Доналд Трамп маъмурияти томонидан тахминан бир ой ичида мингдан ортиқ чет эллик талабанинг ҳуқуқий мақоми ва визалари бекор қилингани тўғрисида хабар берилганди. Бу ҳолатдан энг кўп Ҳиндистон ва Хитой фуқаролари зарар кўрган.