Кремль Украинада ўт очишни тўхтатиш талабига жавоб қайтарди

Песков Украинада ўт очишни тўхтатиш талабларини «ультиматумлар тили» деб атади, буни «Россия учун қабул қилиб бўлмайди».

Фото: РИА Новости

Кремль Ғарб етакчиларининг Украинада ўт очишни тўхтатиш ва тинчлик музокараларини бошлаш ҳақидаги талабларини қабул қилиб бўлмайдиган «ультиматум» деб атади. Бу ҳақда 12 май, душанба куни Кремль матбуот котиби Дмитрий Песков маълум қилди.

«Бу огоҳлантиришдан олдин биз куни кеча ҳам огоҳлантиришни эшитган эдик. Ёдингизда бўлса, улар ҳам ультиматум кўринишида айтилган эди. Бундай ультиматум тили Россия учун қабул қилиниши мумкин эмас. Россия билан бундай тилда гаплаша олмайсиз», — деди Песков.

Аввалроқ Германия ҳукумати матбуот котиби Штефан Корнелиус, агар Москва расмийлари 12 майда Украинадаги жанговар ҳаракатларни тўхтатиш бўйича талабларни бажармаса, Берлин европалик ҳамкорлар билан санкциялар тайёрлашини айтди.

Песковнинг сўзларига кўра, Россия «узоқ муддатли тинч йўл билан келишувга эришиш йўлларини жиддий излашга» бел боғлаган. Кремль матбуот котиби Россия президенти Владимир Путиннинг Туркияда Россия ва Украина ўртасидаги тўғридан тўғри музокараларни қайта бошлаш таклифини яна бир бор эслади, бироқ Украина президенти Володимир Зеленскийнинг Путинга уларда шахсан иштирок этиш таклифига изоҳ бермади.