ЕИ Шенген чегараларида муҳр қўйишни бекор қилишга келишиб олди

Европа Иттифоқи Кенгаши ва Европарламент Европа Иттифоқи чегарасида паспорт штамплари ўрнини босувчи автоматлаштирилган кириш/чиқиш тизимини (Entry/Exit system, EES) босқичма-босқич ишга тушириш бўйича дастлабки келишувга эришди. Бу ҳақда 19 май, душанба куни ЕИ кенгаши сайтида маълум қилинди.

Тизимни жорий этиш тўғрисидаги қарор 2017 йилда қабул қилинган ва унинг ишга туширилиши бир неча бор қолдирилди. Якуний муддат 2024 йил эди. Бироқ ўтган йилнинг охирида Европа Комиссияси (ЕК) Германия, Франция ва Нидерландия уни жорий этишга тайёр эмаслиги сабабли EES'ни ишга туширишни яна кейинга қолдирди. Кейин ЕК тизимни бир марталик эмас, балки босқичма-босқич ишга тушириш учун янги қоидаларни яратишни талаб қилди.

Янги келишув EES'ни босқичма-босқич жорий этиш учун олти ой вақт беришни таклиф қилади. «Ушбу ўтиш даври тугагунга қадар аъзо давлатлар саёҳат ҳужжатларига қўлда муҳр қўйишда давом этади», — дейилади пресс-релизда. EES хорижга чиқиш паспортларидаги штампларни тўлиқ алмаштириши ҳақида аввал хабар берилган эди.

Европа Иттифоқи Кенгаши ва Европа Парламенти ўртасидаги келишув EES дарҳол жорий этилишини англатмайди. Тизимни босқичма-босқич ишга тушириш санаси Европа Комиссияси томонидан белгиланиши керак. Бундан ташқари, 19 май куни эришилган келишув дастлабки ҳисобланади ва у ҳали Европа Иттифоқи Кенгаши ва Европа Парламенти томонидан тасдиқланиши керак.