Тўтиқуш Австралиянинг биринчи ракетаси парвозига тўсқинлик қилди

Катта какаду тўтиқуши парвоз майдончасида симларга «ғайритабиий қизиқиш билдиргани» маълум бўлди.

Фото: Gilmour Space Technologies

Австралиянинг Gilmour Space Technologies стартапи май ойи ўрталарида узоқ кутилган 23 метрли Eris ракетаси парвозини электр симларидаги носозлик туфайли бекор қилишга мажбур бўлди.

Муаммонинг сабабини излаш жараёнида қўпорувчиликда гумон қилинувчи аниқланди. Бу катта какаду тўтиқуши бўлиб, у парвоз майдончасида кабелларга «ғайритабиий қизиқиш билдиргани» маълум бўлди.

Қушнинг айбдор экани расман исботланмаган бўлса-да, компания расмийлари бу ракета тизимида қувватнинг кескин кўтарилишига «камида ҳисса қўшган омил бўлиши мумкинлигини» тахмин қилмоқда.

Gilmour Space Technologies расмийларининг айтишича, тизимдаги носозлик бўйича ички текширув давом этмоқда ва улар тез орада янги парвоз вақтини эълон қилишади.

Тайёрлаган: Сардор Юсупов

#ракета #Австралия #тўтиқуш