Трамп солиқлар тўғрисидаги «катта ажойиб» қонун лойиҳасини имзолади

АҚШ президенти Доналд Трамп 4 июл, жума куни кечқурун солиқларни камайтириш ва АҚШ давлат қарзининг чегарасини 4 триллион доллардан ортиқроққа ошириш мумкинлиги ҳақидаги «катта ажойиб» қонун лойиҳасини имзолади. «Бу яхши», — дея ўз хатти-ҳаракатларини изоҳлади у ҳужжатни Оқ уйда ўнлаб республикачи қонунчилар қуршовида маркер билан имзолаб.

«Америка ғалаба қозонмоқда, ғалаба қозонмоқда, ҳеч қачон бўлмаганидек ғалаба қозонмоқда», — дея қўшимча қилди Трамп ҳужжатни имзолаганидан сўнг АҚШ Мустақиллик кунига бағишланган маросимни якунлаб. Яқинда Эрон ядро иншоотларини бомбардимон қилган учувчилар тадбирга таклиф этилганлар орасида эди, деб хабар беради AFP.

АҚШ Конгрессининг вакиллар палатаси Сенат томонидан маъқулланганидан кўп ўтмай, 3 июл куни президент томонидан илгари сурилган «катта ажойиб» қонун лойиҳасини маъқуллади. Ҳужжат кам фарқ билан қўллаб-қувватланди: 218 конгрессмен «ёқлаб», 214 нафари қарши чиқди.

Қонун лойиҳаси солиқларни пасайтириш, иммиграция хизматларини молиялаштиришни ошириш ва камбағаллар, ногиронлар, кам таъминланган оилалар фарзандлари ва бошқа ижтимоий ҳимояга муҳтож шахсларнинг тиббий харажатларини тўлашга ёрдам берадиган Medicaid дастурига харажатларни камайтиришни назарда тутади. Шу билан бирга, у мудофаа соҳасига, хусусан, «Олтин гумбаз» ракеталарга қарши мудофаа тизимини ривожлантиришга сарфланадиган харажатларни оширишни назарда тутади.

Ташаббуснинг энг ашаддий мухолифларидан бири миллиардер ва Tesla асосчиларидан бири Илон Маск бўлиб, у Трампнинг қонун лойиҳаси мамлакат аҳолисини қарз чуқурлигига олиб келишини даъво қилмоқда. Маскнинг ҳужжатни танқид қилиши тадбиркор ва давлат раҳбари ўртасида жанжал ва ҳақорат алмашинувига сабаб бўлди.