Молдовадан қочган олигарх Плахотнюк Грецияда ушланди

Молдовадан қочган олигарх Владимир Плахотнюк Афина аэропортида қўлга олинди, деб хабар берди Кишинёв полицияси. Собиқ сиёсатчи фирибгарлик ва пул ювишда айбланиб, халқаро қидирувга берилган.

Фото: Imago/Le Pictorium/S. Souicix

Молдова Демократик партияси (ДПМ) собиқ раҳбари, олигарх Владимир Плахотнюк ва молдовалик кикбоксчи Константин Цуцу Афина аэропортида Дубай (БАА)га учаётган вақтда қўлга олинди. Бу ҳақда Молдованинг Ziarul de Garda (ZdG) газетаси хабар берди. Молдова полицияси бош комиссари Плахотнюкнинг ушланганини тасдиқлади. Уларнинг аниқлик киритишича, бу ҳақда Интерпол хабар берган.

ZdG газетасининг ёзишича, бир гуруҳ Молдова фуқаролари Греция орқали транзит ўтаётган бўлган. Норасмий маълумотларга кўра, Плахотнюк ва Цуцу ўзгалар номига расмийлаштирилган паспорт билан саёҳат қилган. ДПМнинг собиқ раҳбари Мексика паспортига эга бўлиши мумкин. Цуцу аввалроқ Молдова парламентининг ДПМдан аъзоси бўлган.

Плахотнюк халқаро қидирувда ва Европа Иттифоқининг санкциялар рўйхатига киритилган. Олигарх 2016 йилдан 2019 йилгача ҳокимиятда бўлган ДПМни бошқарган. У Молдованинг амалдаги президенти Игор Додоннинг рақиби эди. Плахотнюк Кишинёв парламенти депутати ва мамлакатдаги энг бой тадбиркорлардан бири бўлган.

Владимир Плахотнюк Молдовадан 2019 йилнинг ёзида, ДПМ мухолифатга ўтганидан сўнг дарҳол қочиб кетди. Шундан сўнг у партия раислигидан ва депутатлик мандатидан воз кечди. 2019 йил октябр ойида Молдова ҳуқуқ-тартибот идоралари Плахотнюкнинг умумий қиймати 3 миллион доллардан ортиқ бўлган мол-мулки ва банк ҳисобларини мусодара қилди. Россия фуқаролигига эга бўлган тадбиркор халқаро қидирувга берилган.