БМТ томонидан қўллаб-қувватланадиган IPC кузатув гуруҳи айни пайтда Ғазода минглаб болалар тўйиб овқатланмаётгани, оқибатда кичик ёшдаги болалар орасида очлик билан боғлиқ ўлим кўпайганини билдирди. «Чегара билмас шифокорлар» ташкилоти эса «озиқ-овқат машиналари тўла юк машиналари Ғазо чегарасида турганида, парашютдан арзимаган ёрдам ташлаш бу – мазах қилишдир», дея Исроилни танқид қилди.
«Ғазода юз бераётган инсонпарварлик фожиасини ҳаводан ташланган ёрдам юклари билан тўхтатиб бўлмайди. Ғазо секторида энг ёмон ҳолат очарчилик сценарийси – ҳозирда рўй бермоқда», дейилади БМТ билан ҳамкорликда ишловчи Озиқ-овқат хавфсизлиги босқичларини интеграллашган таснифи (Integrated Food Security Phase Classification) IPCʼнинг огоҳлантирувчи ҳисоботида.
Уларнинг таъкидлашича, «дарҳол ва тўсқинликсиз» инсонпарварлик ёрдами Ғазога киритилмагунча, очлик ва ўлим ҳолатлари кескин ортишда давом этади. The Guardian нашрининг ёзишича, бу баёнот IPC томонидан Ғазода очарчилик расман эълон қилинаётганини англатмайди, бироқ огоҳлантирувда қуйидагилар қайд этилган:
«Тўйиб овқат емаслик, озиқланиш етишмовчилиги ва касалликлар кенг тарқалмоқда. Булар очликдан келиб чиқаётган ўлимлар сонининг ошишига сабаб бўлмоқда».
Сўнгги маълумотларга кўра:
- Ғазонинг аксарият ҳудудларида озиқ-овқат истеъмоли очарчилик мезонларига етган;
- Ғазо шаҳрида эса кескин озиқ-овқат етишмовчилиги ҳолатлари кузатилмоқда.
Ҳисоботда таъкидланишича, 2024 йилнинг июль ойи биринчи ярмида болалар орасида «озиқ-овқат етишмовчилигининг оғир шакли» кескин ошган. Апрель ойи бошидан июль ойи ўрталаригача 20 000 дан ортиқ бола даволаниш учун шифохоналарга ётқизилган, улардан 3000 нафардан ортиғи – оғир аҳволда.
