Москвага борадиган АҚШ махсус вакили, Яман қирғоқларида фожиа ва Россия-Хитой ҳарбий машқлари — кун дайжести

Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.

Трамп: Махсус элчи Уиткофф 6 ёки 7 август куни Россияга ташриф буюради

АҚШ президентининг махсус элчиси Стивен Уиткофф 6 ёки 7 август куни Россия раҳбарияти билан музокаралар ўтказиш учун Россияга ташриф буюради. Бу ҳақда АҚШ президенти Доналд Трамп 3 август, якшанба куни журналистларга маълум қилди.

Трампнинг сўзларига кўра, Уиткофф ҳозирда бор эътиборини Ғазо секторига қаратган. «У, эҳтимол, келаси ҳафта, чоршанба ёки пайшанба куни Россияга кетади. Улар уни кўришни истади, учрашувга таклиф қилди. Демак, нима бўлишини кўрамиз», — деди Трамп.

Агар Россия Украинада тинчлик ўрнатишдан бош тортса нима бўлади, деган саволга Трамп шундай жавоб берди: «Демак, санкциялар бўлади. Лекин улар санкцияларни айланиб ўтишга жуда уста. Шундай қилиб, нима бўлишини кўрамиз».

АҚШ президентининг сўзларига кўра, санкциялардан қочиш учун Москва «одамлар ўлимини тўхтатиш мақсадида битим тузиши» керак. «Биз кўплаб мамлакатларнинг уруш олиб боришини тўхтатдик», деди Трамп Ҳиндистон ва Покистон, Камбоджа ва Таиланд, Конго Демократик Республикаси ва Руандани мисол сифатида келтириб. «Биз бу урушни ҳам тўхтатамиз ва кимдир буни қилиши керак», деди республикачи.

Исроилнинг Ғазодаги тажовузи қурбонлари сони 60 мингдан ошди

Исроилнинг Ғазо секторида 2023 йил 7 октябрдан бери давом этаётган тажовузи қурбонлари сони 60 839 нафарга етди. Бу ҳақда Ғазо секторидаги Фаластин соғлиқни сақлаш вазирлиги баёнотида маълум қилинди.

Баёнотга кўра, сўнгги 24 соат ичида эксклавнинг 119 нафар аҳолиси ҳалок бўлган, яна 866 нафари жароҳатланган.

Исроилнинг 2023 йил 7 октябрдан бери уюштирган ҳужумлари натижасида жами 149 588 киши жароҳатланди.

18 март куни Исроил армияси 19 январда ҲАМАС билан келишилган ўт очишни тўхтатиш келишувини бузди ва Ғазо секторига яна оммавий ҳужумларни бошлади. Ўшандан бери ҳужумлар натижасида 9350 киши ҳалок бўлди, яна 37 547 киши яраланди.

27 майдан буён 1487 фаластинлик АҚШ ва Исроил томонидан бошқариладиган «Ғазо гуманитар ёрдам жамғармаси» ташкил этган ёрдам тарқатиш пунктларига уюштирилган ҳужумлар натижасида ҳалок бўлди, 10 578 нафари яраланди.

Минглаб ҳалок бўлганларнинг жасади эксклавдаги вайрон бўлган бинолар остида қолмоқда.

Россия ва Хитой ҳарбий машқлари: Япон денгизида манёврлар бошланди

Россия ҳарбий-денгиз флоти ва Хитой ҳарбий-денгиз кучларининг кемалари 3 август, якшанба куни Россия-Хитой қўшма ўқув машғулотларининг «амалий қисмини» ўтказиш учун Япон денгизига жўнаб кетди, дея хабар бермоқда ТАСС давлат агентлиги Россия Тинч океан флоти матбуот хизматига таяниб.

«Бирлашган отряд таркибига сувости кемаларига қарши йирик «Адмирал Трибуц» кемаси ва «Громкий» корвети, шунингдек, «Шаосин» ва «Урумчи» эсминецлари киради», — дейилади хабарда.

Япон денгизидаги ҳарбий машғулотларнинг денгиз қисми 5 августгача давом этади. Тахминларга кўра, денгизчилар денгиз авиацияси кўмагида "денгизда қидирув-қутқарув ишларида қўшма ҳаракатларни такомиллаштиради, шунингдек, сувости кемаларига қарши ва ҳаво мудофааси вазифаларини машқ қилади, Тинч океани флотининг ҳарбий-денгиз полигонларидан бирида биргаликда артиллериядан ўт очиш машқини ўтказади", деб ёзади Россия давлат агентлиги.

Икки кун аввал Владивостокда Россия-Хитой қўшма «Денгиз ҳаракати – 2025» ўқув машғулотларининг очилиш маросими бўлиб ўтди, деб хабар қилди Тинч океан флоти матбуот хизмати. Уларда иштирок этиш учун Хитой ҳарбий кемалари Россиянинг Узоқ Шарқ портига бир кун олдин келди.

«Шаосин» ва «Урумчи» эсминецларидан ташқари, рўйхатга «Цяндаоху» комплекс таъминот кемаси, «Сиху» сувости қутқарув кемаси ва дизел-электр сувости кемаси ҳам киритилган. Россия ҳарбий-денгиз флотидан машқларда «Адмирал Трибуц» катта сувости кемасига қарши кема, «Громкий» корвети, «Игорь Белоусов» қутқарув кемаси ва «Волхов» сувости кемаси иштирок этмоқда.

Зеленский Украина ҳаво кучлари қўмондонини тайинлади

Украина президенти Володимир Зеленский генерал-лейтенант Анатолий Кривоножкони Украина ҳаво кучлари қўмондони этиб тайинлади.

Бу ҳақда давлат раҳбари ўзининг Telegram-каналида маълум қилди.

«Мен генерал-лейтенант Анатолий Кривоножкони Украина ҳаво кучлари қўмондони этиб тайинладим. Ва энг муҳими, келажакда Украина жанговар авиацияси ва ҳаво мудофааси кучлари ҳар томонлама ва самарали ҳамкорликда ривожланади: Украина Қуролли кучлари, Бош штаб, Мудофаа вазирлиги, ҳамкорларимиз жамоалари ва Украинага куч ҳамда ғалаба тилаган профессионал экспертлар», — деб ёзган Украина раҳбари.

2024 йил 30 августда Зеленский 2021 йил августидан буён ушбу лавозимда ишлаб келган Украина ҳаво кучлари қўмондони Николай Олешчукни лавозимидан озод қилди.

Яман қирғоқларида камида 68 нафар африкалик муҳожир ҳалок бўлди

Эфиопиядан келган камида 68 муҳожир Яман қирғоқларида, Адан кўрфазида қайиғи ағдарилиб кетиши оқибатида чўкиб кетди. Бу ҳақда Американинг Associated Press агентлигига 3 август, якшанба куни Халқаро миграция ташкилоти (ХМТ) хабар берди.

Фожиа Яманнинг Абян вилояти қирғоқларида содир бўлди. ХМТнинг Ямандаги ваколатхонаси маълумотларига кўра, қайиқда 154 нафар муҳожир бўлган. Улардан 68 нафарининг жасади қирғоққа чиқиб кетган. Яна 74 нафари бедарак йўқолган. 12 киши қутқарилди.

Африкалик муҳожирлар Саудия Арабистони ва бошқа Форс кўрфази давлатларига у ердан иш топиш учун Жибути ва Эритреядан денгиз орқали Яманга боришга ҳаракат қилмоқда.

ХМТ маълумотларига кўра, 2024 йилда бундай сафарни 60 мингдан ортиқ киши амалга оширган. 2024 йил июн ойида денгиздаги қайиқ ҳалокатида 49 нафар муҳожир ҳалок бўлган, 140 нафари бедарак йўқолган.