“3 килога етган”: Самарқандда 80 ёшли бемордаги йирик буқоқ олиб ташланди

Самарқанд шаҳар тиббиёт бирлашмаси марказий шифохонасида 80 ёшли отахоннинг 3 килограммга етган буқоғи операция орқали олиб ташланди. Бу ҳақда Kun.uz’га бирлашма бошлиғи Аҳмаджон Бобожонов маълум қилди.

“Биз беморда “гигант тугунли нотоксик буқоқ” деб аталадиган жуда кам учрайдиган патологияни аниқладик. Асосий сабаб – узоқ йиллик йод етишмовчилиги. Бу ҳолатларда қалқонсимон без ҳаётий функцияларни қийинлаштириб қўяди ва бемор фақат операция ёрдамида соғайиши мумкин.

Бундай мураккаб жараёнда ҳар бир миллиметр муҳим. Биз нафақат тугунларни олиб ташлашимиз, балки беморнинг ҳиқилдоқ нервлари ва қон-томирларини асраб қолишимиз керак эди. Операция муваффақиятли ўтди. Бемор қисқа вақт ичида ўзига келиб, нафас олиши ва ютиниши енгиллашди”, — дейди тиббиёт фанлари доктори, профессор Аҳмаджон Бобожонов. 

Ҳозирда бемор тўлиқ соғайган ва шифокорлар тавсиясига мувофиқ енгил муолажаларни давом эттирмоқда.