«Путиннинг саройи» яқинида Украина дрони қулаганидан сўнг юз берган ёнғин 4 кунда ўчирилди

Геленжик яқинида Украина учувчисиз учоғининг қулаши натижасида бошланган катта ўрмон ёнғини ўчирилди. Бу ҳақда Краснодар ўлкаси губернатори Вениамин Кондратев ўзининг Telegramʼдаги каналида маълум қилди. Вилоят раҳбарининг сўзларига кўра, тўрт кун давомида ёнғин билан 500 дан ортиқ киши курашган, шунингдек, 100 та техника, жумладан, Ил-76 ва иккита Ми-8 вертолёти жалб қилинган.

Криница қишлоғи яқинида содир бўлган ёнғин 42 гектар майдонни қамраб олган. Идокопас буруни Криницадан атиги 10 километр узоқликда жойлашган бўлиб, Коррупцияга қарши кураш фонди (ФБК) суриштирувига кўра, у ерда Россия президенти Владимир Путиннинг «саройи» жойлашган.

Икки соатлик ФБК суриштирув филмида «Путин саройи» қурилишига камида 100 миллиард рубл сарфлангани айтилган. Жамғарма маълумотларига кўра, 17 691 квадрат метр майдонга эга бино Россиядаги энг йирик хусусий турар жой биноси ҳисобланади. Ён атрофдаги ҳудудда муз саройи, черков, оранжерея, чой уйи ва денгизга қараган туннел мавжуд. Асосий бино устида парвозлар тақиқланган ҳудуд ташкил этилган ва унинг ёнидан денгизга тушиш тақиқланган, дея хабар беради ФБК.