БМТ Бош ассамблеяси раҳбари Украинага тинчликпарварлар юборилишини истисно этмади

Анналена Бербок келажакдаги тинчлик шартномасини таъминлаш учун «кўк дубулғалилардан» фойдаланиш имкониятини кўрмоқда. Киев хавфсизлик кафолатларини талаб қилмоқда.

Анналена Бербок Фото: Richard Drew/AP/picture alliance

БМТ Бош ассамблеясининг янги раиси Анналена Бербокнинг сўзларига кўра, БМТ тинчликпарвар кучларининг иштироки келажакда Украинадаги урушни тартибга солишнинг бир қисмига айланиши мумкин. «Агар гап тинчлик шартномаси ҳақида кетса, уни иложи борича ҳимоя қилиш керак бўлади. Ва агар аъзо давлатларнинг кўпчилиги бунинг учун кўк дубулғалилар керак, деса, бу тинчликни узоқ вақт давомида таъминлаши мумкин», деди Германия ташқи ишлар вазирлигининг собиқ раҳбари Bild am Sonntag ҳафталигига берган интервюсида.

Бербок биринчи навбатда тинчлик музокаралари бошланиши кераклигини таъкидлади. Украина иттифоқчилари бир неча ойдан бери эҳтимолий сулҳ ёки тинчлик шартномасини таъминлаш вариантларини муҳокама қилмоқда, бироқ Россия ҳалигача мулоқотга киришиш истагини кўрсатгани йўқ.

2022 йил феврал ойидан бери Украина Россиянинг кенг кўламли қуролли босқинини қайтармоқда. Киев сулҳ тузилса ёки уруш тугаса, мамлакатга аниқ хавфсизлик кафолатлари керак бўлишини таъкидламоқда. Ҳарбий экспертлар ва олимларнинг фикрича, бунинг учун, масалан, Европа иттифоқчиларидан юз минглаб аскар керак бўлади. Бирлашган Миллатлар Ташкилотининг кўк дубулғалилар миссияси муқобил вариант сифатида кўриб чиқилмоқда.