Сунъий интеллект ишчиларни янада банд қилади

ITPro маълумотларига кўра, Nvidia бош директори Женсен Хуанг сунъий интеллект ва технология ривожланиши билан одамларда иш янада кўпайишидан хавотирда. Унинг тушунтиришича, авваллари узоқ давом этган кўплаб вазифалар энди тезроқ бажарилади. Ва унумдорликнинг ошиши билан янги ғояларни амалга ошириш учун кўпроқ имконият пайдо бўлади.

Нашрнинг фикрича, Хуангнинг баёноти ташвишли ҳақиқатга ишора қилади: сунъий интеллект корпоратив муҳитда янада катта иш юкига олиб келади.

Сунъий интеллект соҳаси етакчилари сунъий интеллект одамларга ишнинг «қизиқроқ» жиҳатларига эътибор қаратиш имконини беради, демоқда, бироқ улар амалда бу нимани англатишини ҳеч тушунтириб бермади. Ишлаб чиқувчиларнинг таъкидлашича, СИ воситалари одатий вазифаларни енгиллаштиради ва ходимларнинг иш юкини камайтиради. Бироқ, аслида, ишчиларга янги вазифалар қўйилади, уларнинг иш ҳажми ошади.

Хуангнинг фикрича, иқтисодиёт ўсади ва натижадорлик ошади. Шу билан бирга, ишчилар кўпроқ иш қилиши керак бўлади. Шунингдек, у келажакда одамлар тўрт кунлик иш ҳафтасига ўтиши мумкинлигига умид билдирди. Унинг тушунтиришича, дунёда бир вақтлар етти кунлик иш ҳафтаси бўлган, кейинчалик у беш кунлик иш ҳафтасига ўтиб кетган. Хуангнинг сўзларига кўра, сунъий интеллект сўнгги ўн йилликларда кескин ўзгарган меҳнат амалиётлари эволюциясининг янги катализаторига айланиши мумкин.

ITPro таъкидлашича, тўрт кунлик иш ҳафтаси билан янада самарали келажак орзулари ўта оптимистик кўринади. Технологик компаниялар соғлом меҳнат шароитлари учун курашишга ўрганмаган. Пандемиядан сўнг улар ишчилардан офисга қайтишни талаб қилди, гарчи кўпчилик гибрид форматни қўллаб-қувватласа ҳам.

Агар сунъий интеллект ишчилар вақтининг бир қисмини бўш қилса, эҳтимол бу иш ҳафтасини қисқартирмайди. Аксинча, бу фақат ходимларнинг қисқаришига ва иш юкининг ошишига олиб келиши мумкин. Агар ўн киши қўшимча вақтга эга бўлса, компаниялар фақат беш нафарини сақлаб қолиши мумкин.