Доналд Трампнинг АҚШ 45- ва 47-президенти сифатидаги иккита портрети ўртасида автоперо – автоматик имзо ёки дастхат қўйиш қурилмаси сурати пайдо бўлди. Тегишли суратни Оқ уй 24 сентябр куни ижтимоий тармоқда эълон қилди.
Автоперо Жо Байденнинг президентлик муддати охирида чиқарилган ҳукмларни юмшатиш ёки маҳбусларни афв этишда ишлатилган. Унинг ўзи бу қарорларни оғзаки маъқуллаганини, ёрдамчилари эса «гап жуда кўп ҳужжатлар ҳақида кетаётгани» учун автоперодан фойдаланганини айтган.
Трампнинг таъкидлашича, Байденнинг афв этиш тўғрисидаги қарорлари ҳақиқий эмас, чунки улар автоперо ёрдамида имзоланган. Трампнинг айтишича, қурилмадан собиқ президентга билдирмасдан фойдаланишган, Байденнинг ўзи буни рад этиб келмоқда.
Доналд Трамп иккинчи президентлик муддатига сайланганидан кейин собиқ президент Барак Обаманинг портретини Оқ уйнинг ёпиқ қисмига кўчиришни буюрди. Трамп, шунингдек, катта Жорж Буш ва кичик Жорж Буш портретларини камроқ кўринадиган жойларга кўчиришни талаб қилди.
