Трамп ўзига Нобел мукофоти берилмаса, буни «ҳақорат» деб қабул қилади

Оқ уй раҳбарининг сўзларига кўра, у тинчлик учун Нобел мукофотини шахсан ўзи учун эмас, АҚШ учун олишни хоҳлайди.

Фото: Evan Vucci/AP Photo/picture alliance

2025 йилги тинчлик бўйича Нобел мукофоти лауреати эълон қилинишидан ўн кун олдин АҚШ президенти Доналд Трамп мукофот унга берилиши кераклигига ишонч билдирди. Бошқа ҳар қандай қарор Қўшма Штатлар учун «ҳақорат» бўлади, деди Трамп 30 сентябр, сешанба куни Виржиниядаги Куантико ҳарбий базасида АҚШнинг юқори мартабали ҳарбий амалдорлари билан учрашувда.

У тинчлик учун Нобел мукофотини шахсан ўзи учун эмас, АҚШ учун олишни исташини айтди.

Трамп, хусусан, Ҳиндистон ва Покистон, Миср ва Эфиопия, Сербия ва Косово ўртасидаги можароларни тилга олиб, январ ойида президентликка келганидан бери еттита урушни тугатганини бир неча бор даъво қилган.

Ню-Йоркда бўлиб ўтган БМТ Бош ассамблеясининг 80-сессиясида Украина етакчиси Володимир Зеленский DW'нинг саволига жавоб берар экан, агар Трамп Россия билан урушни тўхтата олса, уни Нобел тинчлик мукофотига номзод қилиб кўрсатишга ваъда берди. «Трампда бу урушни тугатиш имконияти бор ва агар у буни тугатса, барча украиналиклар буни мамнуният билан қилишига аминман. Чунки бу ақл бовар қилмайдиган миссия — уни тугатиш», деди у. Трампнинг ўзи DW'нинг Киев уни номзод қилиб кўрсатиши мумкинми деган саволига: «Нега бундай бўлиши мумкин эмас?» деб жавоб берди.