Қўшимча функционаллар
-
Тунги кўриниш
Кардиологлар АҚШга кўчиб ўтганларда юрак билан боғлиқ хавф ортиши ҳақида огоҳлантирди
Қўшма Штатларга бошқа мамлакатлардан кўчиб келган одамларда юрак-қон томир касалликларига қарши иммунитет маҳаллий америкаликлардагига қараганда кучлироқ бўлади. Бироқ, кардиологлар аниқлашича, бу афзаллик мамлакатда яшаш муддати ошгани сайин йўқолиб боради. Шифокорлар ўз хулосаларини Бирлашган Араб Амирликларида бўлиб ўтаётган кардиология анжуманида тақдим этишмоқда.
Фото: Chalo Gallardo, unsplash.com
Олимлар 2011 ва 2016 йиллар оралиғида тўпланган National Health and Nutrition Examination Survey (NHANES) Америка миллий дастурининг 16 000 га яқин иштирокчиларидан олинган маълумотларни таҳлил қилди. Дастур аҳолининг саломатлиги ва овқатланиш ҳолатини баҳолаш учун интервюлар, физик текширувлар ва лаборатория тестларини ўз ичига олади.
Тадқиқотчилар юрак-қон томир тизими учун хавф билан боғлиқ параметрларга эътибор қаратди. Хусусан, таҳлил тана массаси индекси, диабет, юқори қон босими, липид алмашинувининг бузилиши ва чекиш одати ҳақида маълумотни ўз ичига олади. Иштирокчилар гуруҳларга бўлинган: Қўшма Штатларда туғилганлар ва мамлакатда 15 йилдан кам ёки кўпроқ яшаган иммигрантлар.
АҚШда туғилган иштирокчиларнинг 86,4 фоизида ва иммигрантларнинг 80,1 фоизида камида битта хавф омили аниқланган. Шу билан бирга, мамлакатда 15 йилдан камроқ вақт давомида яшаган чет элда туғилган иштирокчиларда гипертония (38,3 фоизга нисбатан 48,5 фоиз) ва юқори холестерин (27,8 фоизга нисбатан 30 фоиз) маҳаллий иштирокчиларга қараганда камроқ бўлган. Улар орасида чекувчиларнинг улуши ҳам пастроқ: 12,5 фоизга нисбатан 19,9 фоиз.
Қўшма Штатларда 15 йилдан кўпроқ вақт ўтказган муҳожирлар туғилгандан бери мамлакатда яшаганларга қараганда кўпроқ диабет касаллигига чалинган (15,4 фоизга нисбатан 11,2 фоиз) ва икки гуруҳда липид алмашинуви бузилишининг тарқалиши деярли бир хил (29,4 фоизга нисбатан 30 фоиз).
Тадқиқотчилар алоҳида таъкидлашича, осиёлик муҳожирларда диабет билан касалланиш даражаси 14,5 фоизга етган, бу АҚШда туғилган бир миллатга мансуб одамларга нисбатан икки баравар кўп (6 фоиз).
Тадқиқотчилар Қўшма Штатларда яшаш муддати билан юрак учун хавф ортишига сабаб бўлиши мумкин бўлган омилларни санаб ўтди. Буларга америкаликларнинг носоғлом овқатланиш одати ва ҳаракатсиз турмуш тарзини босқичма-босқич қабул қилиш, анъанавий турмуш тарзи ва профилактика ролини ўйнаши мумкин бўлган амалиётлардан тобора чекиниш киради. Иммигрантлар, шунингдек, молиявий муаммолар ва иш жойининг беқарорлиги туфайли тез-тез стрессни бошдан кечиради ва соғлиқни сақлаш хизматидан фойдаланишдаги қийинчиликлар касалликларни ўз вақтида аниқлаш ва даволашга тўсқинлик қилади.
