Самарқанд шаҳри Бағдод кўчасида кўп қаватли уй қурилиши вақтида ер ўпирилиши юз бериб, йўл четида турган катта юк машинаси котлованга тушиб кетди. Kun.uz'га мурожаат қилган фуқароларга кўра, котлован сабаб йўлнинг бошқа қисмлари ҳам ўпирилиб кетиши мумкин.
“Қурилишга жавобгарлар бу ҳақида огоҳлантирилган бўлса-да, ҳозиргача аҳоли ва автомашиналар хавфсизлиги учун етарли чора кўрилмади. 2 октябр ҳолатига ҳам вазият бартараф этилмаган, шунча қонунбузарлик бўлса-да, қурилиш ҳали ҳам давом этмоқда”, – дейилади мурожаатда.
Самарқанд вилояти қурилиш ва уй-жой хўжалиги соҳасида назорат қилиш инспекциясининг Kun.uz'га маълум қилишича, ҳудудда “Samarqand Oxygen Service” МЖЧ ишлаб чиқариш биноларини бузиб, уларнинг ўрнида кўп қаватли турар жой бинолари қурилишини бошлаган.
Котлован қазиш ишлари эса лойиҳа ва тасдиқланган тартиб асосида олиб борилмаган. Қазиш ишлари вақтида хавфсизлик қоидаларига риоя этилмаган. Бунинг оқибатида йўлнинг қатнов қисмига яқин ҳудудда ер ўпирилиши юз берган ва йўл четидаги юк машинаси котлованга қулаган.
Инспекцияга кўра, қурилиш корхонаси Бағдод кўчасидаги 10-уй ва 26-уйлар оралиғида йўлни сунъий қисқартириб, автотранспорт воситалари ҳамда пиёдалар ҳаракатига тўсқинлик қилган.
Инспекциянинг қўшимча қилишича, 22 сентябр куни қурилиш корхонасига аниқланган камчиликларни бартараф этиш ҳақида кўрсатма берилган. Камчиликларни тузатиш учун 15 кунлик муддат берилган. Агар белгиланган вақт ичида камчиликлар бартараф этилмаса, ташкилот Маъмурий жавобгарлик тўғрисидаги кодекснинг тегишли моддалари асосида жавобгарликка тортилиши мумкин.
