Трамп Путиннинг СҲҚ-3ни узайтириш ғоясини «яхши фикр» деб атади

АҚШ президенти Доналд Трамп 5 октябр, якшанба куни журналистлар билан суҳбатда Россия президенти Владимир Путиннинг Стратегик ҳужумкор қуролларни қисқартириш бўйича (СҲҚ-3) шартномани узайтириш таклифини «яхши ғоя» деб атади.

«Бу мен учун яхши фикр бўлиб туюляпти», деди Трамп Оқ уйдаги брифингда журналистлар саволига жавоб берар экан.

Россия Хавфсизлик кенгашининг 22 сентябрдаги йиғилишида Россия президенти мамлакат келишув муддати 2026 йил 5 февралда тугаганидан кейин камида яна бир йил давомида унга риоя қилишга тайёрлигини маълум қилди.

Путин, шунингдек, СҲҚ-3 муддати тугаши билан ядровий ракета имкониятларини тўғридан тўғри чекловчи сўнгги халқаро шартнома йўқолишини таъкидлади. «Ушбу келишув меросидан бутунлай воз кечиш кўп нуқтаи назардан нотўғри ва узоқни кўрмайдиган қадам бўлади», деди у.

СҲҚ-3 шартномаси 2010 йилда Россия ва АҚШнинг ўша пайтдаги президентлари Дмитрий Медведев ва Барак Обама томонидан имзоланган эди. 2021 йилда у беш йилга узайтирилди. 2022 йил 24 февралда Украинага қарши кенг кўламли уруш бошланганидан кейин Кремл раҳбари бир неча бор ядро қуролидан фойдаланиш билан таҳдид қилган. Бундан ташқари, сўнгги йилларда Россия ядровий доктринасини қайта кўриб чиқди ва Беларус ҳудудида ядро қуролини жойлаштирди.

2023 йил февралида Россия НАТОни Россия стратегик объектларига зарба беришда иштирок этганликда айблаб, СҲҚ-3 шартномасидаги иштирокини тўхтатди.