Павел Дуров Қозоғистондаги Кўлсойда чўмилди, бу қонун билан тақиқланган

Telegram асосчиси Павел Дуров Қозоғистонга ташрифи чоғида Олмаотадаги Кўлсой кўлида чўмилди. Бу ҳақда видео эълон қилиб, «Бу жуда яхши сузиш бўлди» деб изоҳ қолдирди.

Орда нашрининг сўровига кўра, миллий боғ маъмурияти ушбу кўлда чўмилиш тақиқланганини тушунтирди - Кўлсой кўллари давлат табиат боғи таркибига киради ва қоидабузарлик 39320 тенге (≈870 минг сўм) миқдорида жарима билан жазоланади.

Маъмурият кўллардаги сув ҳатто ёзда ҳам 6-8°C даражадан юқорига кўтарилмаслигини, бу эса соғлиқ учун хавфли эканини эслатди.

Шу билан бирга, боғ ходимлари видеонинг ҳақиқийлигига шубҳа билдириб, у нейрон тармоқ ёрдамида монтаж қилинган ёки яратилган бўлиши мумкинлигини тахмин қилди, гарчи Дуровнинг ўзи видеони Телеграм-каналида эълон қилган бўлса ҳам.