OFAC маълумотига кўра, ушбу тармоқ миллиардлаб долларлик Эрон нефт ва нефт маҳсулотларини сотиш ҳамда ташишни ташкил этган. Бу даромад АҚШ хавфсизлигига таҳдид солувчи террорчи гуруҳларни молиялаштиришга хизмат қилган.
АҚШ молия вазири Скотт Бессентнинг сўзларига кўра, Трамп маъмурияти Эроннинг энергетика экспорти тизимини издан чиқариш орқали унинг террорчилик фаолиятини молиялаштириш имкониятини қисқартирмоқда.
“Молия вазирлиги Эроннинг энергия экспорт машинасининг асосий қисмларини йўқ қилиш орқали бу мамлакатнинг нақд пул оқимини пасайтирмоқда”, – деди Бессент.
Баёнотда айтилишича, Эрон нефт ва газини ташишда кўплаб давлатларда рўйхатдан ўтган “соя кемалари” тармоғи ишлатилган. Улар Хитой, БАА, Панама, Ҳонгконг ва бошқа мамлакатлар орқали йўналган.
Санкцияга учраган компаниялар орасида БААда жойлашган Markan White Trading Crude Oil Abroad Co., Slogal Energy DMCC, Amita Petrochemical Trading L.L.C., шунингдек Хитойдаги Shandong Jincheng Petrochemical Group ва Rizhao Shihua Crude Oil Terminal Co. бор.
Улар Эроннинг Persian Gulf Petrochemical Industry Commercial Co. (PGPICC) компанияси орқали юзлаб миллион долларлик LPG савдосини амалга оширган.
АҚШ Молия вазирлиги санкциялар рўйхатига уч нафар ҳиндистонлик тадбиркорни ҳам киритган: Варун Пула, Сония Шрестҳа ва Ияппан Ража. Улар Маршалл ороллари ва Ҳиндистонда рўйхатдан ўтган кемачилик компанияларига эгалик қилади ҳамда Эрон LPG’сини Хитой ва Покистонга ташишда иштирок этган.
Санкциялар, шунингдек, Шандун провинциясидаги Shandong Jincheng Petrochemical Group ва Rizhao Shihua терминалига ҳам қаратилган. Бу корхоналар сўнгги икки йил ичида Эрон нефтидан юз миллионлаб доллар қийматида маҳсулот харид қилган.
Санкциялар натижаси
OFAC маълумотига кўра, санкцияга учраган шахс ва компанияларнинг АҚШдаги барча активлари музлатилади, улар билан ҳар қандай битим АҚШ фуқаролари учун тақиқланади. Қоидабузарларга нисбатан фуқаролик ёки жиноий жавобгарлик чоралари кўрилади.
Баёнотда таъкидланишича, санкциялар мақсади жазолаш эмас, балки Эрон ҳукуматини халқаро меъёрларга риоя қилишга ундашдир.
Аввалроқ расмий Теҳрон БМТнинг Эрон ва унинг ядровий дастурига қарши санкциялари қайта тикланишига «қатъий жавоб беришга» тайёрлигини маълум қилгани хабар қилинганди.
