“Инстаграмчи психологлар” ортида нима яширин. Инфолўлилардан эҳтиёт бўлинг!

1. Диплом ва лицензия сўранг

Ҳақиқий психолог — бу университетда камида бакалавр даражасида таълим олган мутахассис. Сертификатлар билан "психолог" бўлиб олганлардан эҳтиёт бўлинг. Соғлом руҳият билан ишлаш — бу илмий билим талаб қиладиган соҳадир.

2. Диагноз қўймаслиги керак

Психолог эмас, психиатр диагноз қўйиш ҳуқуқига эга. Агар мутахассис сизга "сизда депрессия бор", "биполярсиз", "неврозсиз" деб аниқ таъриф берса — бу профессионал эмаслигининг белгисидир.

3. Шахсий фикрини сингдирмайди

Психолог сизнинг ҳаётингизни баҳоламайди, "шундай қилишинг керак" демайди. У саволлар орқали ўзингизни англашга ёрдам беради. Агар у сизни танқид қилса, ўз фикри ёки қадриятларини сингдирса — бу хавфли сигнал.

4. Ижтимоий тармоқда "чўпчак сотмайди"

Агар у ҳар куни "токсик эрингизни ташланг", "онангиз сизни севмаган" каби кескин маслаҳатлар билан чиқса — бу психолог эмас, контент-маркетолог. Ҳақиқий мутахассис одам руҳиятидан оммавий контент учун фойдаланмайди.

5. Ҳиссиётингизга ишонч

Суҳбатдан кейин енгиллик ҳис қилдингизми ёки айбдорлик ва безовталик? Сизнинг ички ҳолатингиз — бу энг ишончли мезон. Соғлом терапия сизни айбламайди, балки англаш ва қабул қилишга ёрдам беради.

6. "Муаммонгизни битта сеансда ҳал қиламан" демайди

Психологик жараён вақт талаб қилади. Агар кимдир “бир учрашувда ҳаётингизни ўзгартириб бераман” деса — ишонманг. Бу фокусчи ёки инфолўлининг шиори, мутахассисники эмас.

Психолог — сизнинг ҳаётингизни ўзгартирувчи эмас, балки йўл кўрсатувчи кўзгу. У сизнинг ўрнингизга қарор қабул қилмайди, фақат ўзингизни англашга ёрдам беради.