2025 йилнинг энг яхши осмонўпар биноси эълон қилинди

Вертикал урбанизм кенгаши (Council on Vertical Urbanism, CVU) — илгари Баланд бинолар ва шаҳардаги яшаш жойлари бўйича кенгаш (CTBUH) — Белгиянинг Брюссел шаҳрида жойлашган ZIN in No(o)rd лойиҳасига «2025 йилнинг энг яхши осмонўпар биноси» унвонини берди.

Фото: Philippe Van Gelooven

Расмий эълон кенгашнинг Канаданинг Торонто шаҳрида бўлиб ўтган йиллик халқаро конференциясида ўқиб эшиттирилди. Дунё бўйлаб етакчи меъморлар, муҳандислар ва урбанистлар 24 мамлакатдан тақдим этилган лойиҳалар орасида 1970-йиллардаги офис мажмуасини офислар, турар жой бинолари, меҳмонхона ва жамоат жойларини бирлаштирган вертикал аралаш мақсадли экотизимга айлантирган 111 метр баландликдаги ZIN in No(o)rd'ни энг яхшиси сифатида танлади.

Дастлаб, бу битта комплексга учинчи иншоот билан боғланган иккита минора эди. Архитекторлар кўплаб яшил майдонлар ва энергия тежайдиган технологияларни қўшди. Демак, бу шунчаки бино эмас, балки эски биноларни замонавий яшил стандартларга айлантириш бўйича Европа орзусининг тимсолидир.

ZIN in No(o)rd вертикал урбанизмнинг асосий тамойилларини — барқарорлик, фаровонлик ва инновацияларни ўзида мужассам этган. У мавжуд тузилмаларни янги, энергия тежайдиган ва углеродни ҳисобга олган ҳолда архитектура тизимига бирлаштиради.

Бундан ташқари, мавжуд конструкция массасининг 85 фоизи (шу жумладан, ядроси ва подвал сатҳи) сақланиб қолди, қурилиш материалларининг 60 фоиздан ортиғи эса ўз жойида ёки бошқа лойиҳаларда қайта ишлатилди. Бу парник газлар эмиссиясини сезиларли даражада камайтирди ва Европада кенг кўламли мослашувчан реконструкция учун янги стандартни ўрнатди.