Зеленский Трамп билан 17 октябр куни учрашишини тасдиқлади

Володимир Зеленский 17 октябр куни Вашингтонда АҚШ президенти Доналд Трамп билан учрашишини маълум қилди.Украина президентининг сўзларига кўра, улар, жумладан, Киевга узоқ масофага мўлжалланган қуроллар етказиб бериш масаласини муҳокама қилади.

Фото: Mandel Ngan/ AFP

Украина президенти Володимир Зеленский шу ҳафта Вашингтонда АҚШ президенти Доналд Трамп билан учрашишини тасдиқлади. Бу ҳақда у 13 октябр, душанба куни Киевда Европа Иттифоқи олий вакили Кая Каллас билан қўшма матбуот анжуманида маълум қилди. Украина делегацияси, жумладан, бош вазир Юлия Свириденко, президент маъмурияти раҳбари Андрей Ермак, Украина Миллий хавфсизлик ва мудофаа кенгаши котиби Рустем Умеров аллақачон Вашингтонга жўнаб кетган.

Зеленскийнинг ташрифи 17 октябр куни кутилмоқда. Унинг сўзларига кўра, унинг Трамп билан муҳокамаси мавзуларидан бири Украинага узоқ масофали қуроллар етказиб бериш бўлади. Икки манба бу маълумотни Американинг Axios нашрига тасдиқлади: «Улар (Трамп ва Зеленский) Украинага қандай қурол-яроғ етказилиши кераклиги, хусусан, АҚШ Tomahawk ракеталарини тақдим этиш ниятида ёки йўқлигини муҳокама қилади».

Кейинроқ Трамп Зеленский билан 17 октябр куни Оқ уйда учрашишини тасдиқлади, деб хабар беради AFP.

Икки давлат етакчилари 11 ва 12 октябр кунлари гаплашган. Зеленский суҳбатлар ҳақида хабар бериб, иккала мулоқотни ҳам «жуда самарали» деб атади. Axios маълумотига кўра, 11 октябр куни бўлиб ўтган суҳбат чоғида Tomahawk'ни эҳтимолий етказиб бериш мавзуси кўтарилган. «Россия америкаликлар бизга "Томагавклар" бериши мумкинлигидан қўрқаётганини кўряпмиз ва эшитяпмиз. Бу бундай босим тинчликка ҳисса қўшиши мумкинлигидан далолатдир», — деди Зеленский якшанба кунги суҳбатдан сўнг.