Бу корхоналар урушлар, эпидемиялар, иқтисодий инқирозлар ва технологик инқилобларни бошдан кечирган, аммо ҳануз долзарблигини йўқотмаган. World Atlas узлуксиз ишлаётган энг қадимги беш компания рўйхатини тузди.
5. The Royal Mint — Буюк Британия (886 йилда асос солинган).
886 йилда Қирол Алфред (Alfred the Great) даврида ташкил этилган Қироллик Монета фабрикаси (Royal Mint) 1100 йилдан ортиқ вақт мобайнида Буюк Британиянинг расмий танга ишлаб чиқарувчиси ҳисобланади. Илк бор Лондон Тауэрида жойлашган бу муассаса ҳозир Уэлсдаги Ллантрисант шаҳрида қўриқланадиган мажмуада фаолият юритади.
Бугун Royal Mint фақат муомалага чиқарилган тангалар билан чекланмайди: юбилей ва коллекцион тангалар чиқаради, инвестицион олтин ишлаб чиқаради, ҳатто олтин қопламали жамғарма маҳсулотларини ҳам таклиф қилади. Нақд пулдан фойдаланиш босқичма-босқич қисқараётган даврда «ишлаб чиқаришдан люкс маҳсулотлар»гача трансформация қила олиш қобилияти компанияни сақлаб турибди.
4. Tanaka-Iga — Япония (885 йил).
Tanaka-Iga — 885 йилдан бери бутсудан (Butsudan) деб аталувчи буддавий уй буюмларини тайёрлайдиган оилавий компания. Ўйма ёғочдан ясаладиган бу буюмлар кўплаб япон хонадонларида дуо ва аждодларини эъзозлашда марказий ўрин тутади.
Деярли 1200 йиллик мавжудлиги давомида Tanaka-Iga анъанавий ҳунарга содиқ қолган ҳолда, замонавий воситалардан ҳам фаол фойдаланиб, талабни қондириб келмоқда. Бугун бу оддий компания эмас, балки япон санъати ва руҳий анъанасининг посбони сифатида қадрланади.
3. Staffelter Hof — Германия (862 йил).
Мозел водийсида жойлашган Staffelter Hof — дунёнинг энг қадимги узумчилик хўжаликларидан бири. 862 йилда монастир токзорлари сифатида асос солинган бу хўжалик ҳозиргача юқори тоифали маҳсулот ишлаб чиқаришни давом эттирмоқда.
Хўжалик шунингдек туристик масканга айланган: меҳмонхона ва экскурсиялар орқали меҳмонларга минг йиллик анъанасини намойиш этади. Унинг барқарорлиги тарихий брендлар ўз тарихига суяниб туриб, глобал аудиторияни қандай жалб эта олишини кўрсатади.
2. St. Peter Stiftskulinarium — Австрия (803 йил).
803 йилда асос солинган афсонавий St. Peter Stiftskulinarium ресторани Залцбургдаги Сен-Пётр аббатлиги ҳудудида жойлашган. У Европа қитъасининг энг қадимги ресторани сифатида тилга олинади. 1200 йилдан ошиқ фаолияти давомида у подшоҳлар, мусиқачилар ва сайёҳларни — афсоналарга кўра, ҳатто Буюк Карлни ҳам қабул қилган.
