«Лукойл» Молдовада 21 ноябрдан фаолиятини тўхтатади

Молдова расмийлари мамлакатдаги «Лукойл»нинг айрим активларини сотиб олиш ниятида. АҚШ санкциялари туфайли Россия нефт компаниясининг Молдовадагии фаолияти 21 ноябрдан тўхтайди.

Фото: AP

Россиянинг нефт гиганти «Лукойл»нинг Молдовадаги бўлинмалари 21 ноябрдан, АҚШ санкциялари кучга кирган пайтдан бошлаб, ишини тўхтатиши керак. Бу ҳақда 7 ноябр куни мамлакат энергетика вазири Дорин Жунгиету маълум қилди. «Лукойл» компанияси фаолият юрита олмайди», — деб ёзди Жунгиету Facebook’да.

Вазирнинг айтишича, бу «Лукойл» ҳисоблари ва активлари блокланиши, шунингдек, АҚШ Молия вазирлиги компаниянинг хориждаги активларини Швейцариянинг Gunvor’ига сотишга рухсат бермагани билан боғлиқ.

Жунгиету таъкидлашича, Кишинёв аэропортида самолётларга ёнилғи қуйиш учун ягона омбор «Лукойл»га тегишли. Шу боис аэропорт ишини узлуксиз таъминлаш мақсадида давлат ушбу омборни сотиб олишни режалаштирмоқда. Ҳукумат ҳузуридаги инвестициялар кенгаши «Лукойл»га харид таклифини қабул қилиш учун 17 ноябргача муҳлат белгилади.

Молдова энергетика вазири, шунингдек, Кишинёв Россия нефт компаниясига қарши АҚШ санкцияларига қўшилаётганини, бироқ «муаммо ҳал этилгунча, Молдова Республикасига нефт маҳсулотлари етказиб бериш издан чиқмаслиги ва одамлар кундалик ҳаётига таъсир қилмаслиги учун» компанияга фаолиятни вақтинча давом эттиришга рухсат сўралганини қайд этди.

Бундан ташқари, Дорин Жунгиету маълум қилишича, миллий хавфсизлик нуқтаи назаридан Молдова ҳукумати «Лукойл»нинг активларини шахсий компанияга сотиш тўғрисидаги таклифни қабул қилмади. Компания фаолияти тўхтатилгандан кейин ёнилғи етказиб беришни таъминлаш учун Молдова Руминия ва Болгария билан музокаралар олиб бормоқда.

АҚШ Молия вазирлиги ҳузуридаги Ташқи активлар назорати бошқармаси (OFAC) 22 октябр куни Украинадаги урушни тўхтатиш бўйича «Россиянинг жиддий қизиқиши йўқлиги»га оид баёнот ортидан қўшимча санкциялар жорий этди. Янгиланган чекловлар фақат «Лукойл» ва «Роснефть»га эмас, балки уларнинг 34 та шуъба компаниясига ҳам тааллуқли. Шунингдек, «Лукойл» ва «Роснефть» улуши 50 фоизга тенг ёки ундан юқори бўлган барча корхоналар активлари ҳам блокланади.

Бунгача, бир ҳафта олдин, Буюк Британия ҳам «Лукойл» ва «Роснефть»га нисбатан санкциялар жорий этган эди. Ушбу чоралар активларни музлатиш ҳамда траст хизматлари ва транспорт операцияларига чеклов қўйишни назарда тутади. Лондон изоҳлашича, «Роснефть» ва «Лукойл» Россия ҳукуматининг «стратегик аҳамиятга эга» соҳасида — энергетикада фаолият юритади.