Исроиллик кўчманчилар 8 ноябр куни босиб олган Ғарбий соҳил ҳудудидаги ноқонуний посёлкалар яқинида зайтун тераётган фаластинлик қишлоқ аҳолиси, фаоллар ва журналистларга ҳужум қилди.
Reuters нашрининг ёзишича, ушбу ҳужумда агентликнинг икки ходими – журналист ва унга ҳамроҳ бўлган хавфсизлик маслаҳатчиси ҳам калтакланган.
Гувоҳларнинг айтишича, шанба куни тахминан 30 нафар қишлоқ аҳолиси ва фаоллар, шунингдек, 10 га яқин журналист зайтун терими учун тўпланган. Шу вақтда тепаликдаги посёлкалардан ўнлаб эркаклар пастга тушиб, ҳужум бошлаган. Улар Reuters фотомухбири Ранин Савафтани ўзини ҳимоя қилишга уринган пайтда бир неча бор таёқ билан урган.
Воқеани кузатган исроиллик ҳуқуқ фаоли Жонатан Поллакнинг сўзларига кўра, ҳужумда тахминан 50 ниқобли кўчманчилар қатнашган. Унинг айтишича, Савафтага ҳужум қилганлар «уни шафқатсизларча урган, у ерда йиқилган пайтида ҳам тош отишда давом этган ва унга ёрдам бермоқчи бўлган ҳар бир инсонга ҳужум қилган».
Поллакнинг айтишича, кўчманчилар иброний тилида «Бу ердан кет!» деган қичқириқларни ҳам айтган.
Савафта билан бирга Reutersʼнинг хавфсизлик бўйича маслаҳатчиси Грант Бовден ҳам бўлган. У журналистни ҳимоя қилишга уринаётганида калтакланган. Савафтанинг фотоаппарат жиҳозлари синиб кетган.
Иккаласи ҳам дубинкаларга қарши «Пресс» деб ёзилган аниқ белгиларга эга ҳимоя кийимида эди. Дубинка зарбалари кучидан Савафтанинг дубулғасида катта чуқурча пайдо бўлган. Тез ёрдам машинаси уларни Наблус шаҳридаги шифохонага тиббий кўрик ва даволаниш учун олиб кетган. Ҳодиса чоғида яна бир неча киши жароҳат олган.
