НАТО собиқ бош котиби Украина узра “нофлай зона” жорий этмаслик сабабини тушунтирди

Столтенбергнинг сўзларича, Зеленский Киевдаги бункердан қўнғироқ қилиб, НАТОнинг қўшин юбормаслик қарорига рози эмаслигини айтган, аммо «илтимос, ҳаво ҳудудини ёпинг, Россия самолётлари, дронлари ва вертолётларининг парвозларини тўхтатинг», деб сўраган.

«Мен унинг илтимосини тушундим, лекин бу рўй бермасди, — деди Столтенберг. — Чунки агар НАТО Украина ҳаво ҳудудини ёпса, биринчи навбатда Беларус ва Россиядаги РФ ҳаво мудофаа тизимларини йўқ қилишга тўғри келади. Осмонда рус самолёти ёки вертолёти бўлса, уни уриб туширишга мажбур бўлардик — бу эса НАТО билан Россия ўртасида тўлақонли урушни англатарди. Биз бундан қочдик». У шундай қўшимча қилди: «Президент Жо Байден айтганидек, Украина учун Учинчи жаҳон уруши хавфига бормаймиз».

Собиқ бош котиб фикрича, агар НАТО 2014 йилда Қрим қўшиб олиниши пайтида Украинани кучлироқ қўллаб-қувватлаганида, 2022 йилдаги тўлақонли ҳужумнинг олдини олиш мумкин эди. 2022 йил 24 февралдан бошлаб эса алянс икки йўналишда иш юритган: Киевни қўллаб-қувватлашни кучайтириш ва можарони НАТО-Россия тўқнашувига айлантирмаслик.

«Мақсад — Перл-Харбор такрорланишини олдини олиш, бутун алянсни урушга тортмаслик. Шунинг учун Украинани қўллаб-қувватлаймиз, лекин НАТО қўшинларини киритиб, бевосита урушга қадам қўймаймиз. Ҳануз шу ёндашув тўғри, деб ҳисоблайман», — деди у.

Шу билан бирга, Столтенберг Киевга ёрдам «жуда заиф ва кечиккан»ини тан олди: Россияни музокара столига ўтиришга мажбурлаш учун фронтда Украинага кўпроқ ёрдам кераклигини қайд этди. Норвегия суверен жамғармаси ЕИнинг Украинага 100 млрд евролик ҳарбий кредити учун кафил бўлиш-бўлмаслиги масаласида у изоҳ бермади.