Тошкентда Россиядан беморларни қабул қилиш масаласи муҳокама этилди

Новосибирск шаҳридаги хусусий тиббиёт ташкилотлари ва клиникалар вакилларидан иборат бизнес-миссия Тошкентда қатор тиббиёт муассасалари билан учрашувлар ўтказиб, Россиядан келадиган беморларни Ўзбекистонда даволашни ташкил этиш ва ваколатхоналар очиш масалаларини муҳокама қилди.

Фото: “Дунё” АА

“Дунё” АА хабарига кўра, Ўзбекистоннинг Бош консулхонаси (Новосибирск) ва Соғлиқни сақлаш вазирлиги кўмагида Россиянинг Новосибирск шаҳри хусусий клиникалари ва тиббиёт ташкилотлари вакилларидан иборат бизнес-миссия Тошкентга ташриф буюрди.

Ташриф доирасида делегация Тиббиёт ташкилотларини лицензиялаш ва аккредитациялаш маркази, Ўзбекистон Тиббиёт туризми ассоциацияси, Тошкент тиббиёт академиясининг учинчи клиникаси, Ҳамширалар академияси, шунингдек пойтахтдаги хусусий клиникаларда учрашувлар ўтказди.

Музокараларда томонлар Ўзбекистоннинг хирургия, репродуктология, гинекология, ЭКО, онкология ва кардиожарроҳлик йўналишларидаги имкониятлари ва жорий этилаётган технологиялар билан танишди. Шунингдек, Новосибирск клиникалари ваколатхоналарини Ўзбекистонда очиш, ҳамда Новосибирскдан беморларни мамлакат тиббиёт муассасаларига йўналтириш механизмлари муҳокама этилди.

Ташриф якунида делегация 17-Халқаро UzMedExpo-2025 кўргазмасига қатнашди ҳамда “Чирчиқ” технопаркида бир марталик тиббий буюмлар ишлаб чиқарувчи Россия компанияси фаолияти билан танишди.