6 миллион уй учун электр: Dogger Bank денгиз шамол парки ишга тушмоқда

Дунёдаги энг йирик денгиз шамол электр станцияси — Dogger Bank Йоркшир соҳилидан тахминан 130 километрда барпо этилмоқда, у ишга тушгач, ҳар йили олти миллион хонадонни тоза электр энергияси билан таъминлайди.

Фото: Dogger Bank Wind Farm

Лойиҳа SSE Renewables, Equinor ва Vårgrønn компаниялар консорциуми томонидан амалга оширилмоқда ва ҳар бири 1,2 миллион киловатт қувватга эга бўлган учта босқичдан иборат.

Дунёдаги энг йирик денгиз шамол парки сифатида Dogger Bank Британиянинг тоза манбаларга асосланган келажак энергия тизимининг муҳим бўғинига айланади. Ҳисоб-китобларга кўра, у мамлакатга тахминан 7,9 миллиард АҚШ доллари қийматида иқтисодий фойда келтиради ва бутун мамлакат бўйлаб минглаб иш ўринларини яратади.

Шамол парки учта асосий босқичдан иборат: Dogger Bank A, B ва C. Уларнинг қўшма ишлаб чиқариши Британия умумий электр талабининг тахминан 5 фоизини қоплашга етади. Денгиздаги турбиналарда ишлаб чиқарилган энергия юқори кучланишли сувости кабеллари орқали миллий электр тармоғига узатилади.

Dogger Bank A босқичининг илк турбинаси 2023 йил октябр ойида энергия ишлаб чиқара бошлади. Электр станцияси миллий тармоққа электр етказиш учун — Британиядаги шамол парклари орасида илк бор — юқори кучланишли доимий ток (HVDC) узатиш тизимидан фойдаланади.

Мажмуа GE Vernova Haliade-X қуввати 13 мегаватт бўлган шамол турбиналари билан жиҳозланган — улар дунёдаги энг йирик ва энг кучлилaридан ҳисобланади. Узунлиги 107 метр бўлган парраклар ҳар бир айланганда ўртача бир хонадонни икки кунга етарли энергия билан таъминлашга қодир.