Чиқинди қарзи бор истеъмолчи тўғридан тўғри электрдан узилмайди — Энергетика вазирлиги

Ижтимоий тармоқлардаги «мусордан қарзи борлар электрдан узиляпти» сарлавҳалари нотўғри талқин қилинган. Энергетика вазирлигига кўра, бундай ҳолатда абонент электр таъминотидан узилмайди, балки қарз бартараф этилмагунча электр учун тўлов қилиш имкониятига вақтинча чеклов қўйилади.

Фото: Kun.uz

Вазирлик маълумотига кўра, чиқинди хизмати бўйича қарзи мавжуд абонентлар аввалдан «Ҳудудий электр тармоқлари» АЖнинг 2100 қисқа рақамидан СМС огоҳлантириш олади. Агар огоҳлантиришдан сўнг 5 кун ичида қарздорлик қопланмаса, абонентнинг электр энергияси учун тўлов амалга ошириш имконияти (онлайн ёки касса орқали) вақтинча чекланади.

Шу билан бирга, вазирлик таъкидлашича, бу чора электр таъминотини узиш эмас. Истеъмолчи қарзни тўлаши билан вақтинчалик чеклов дарҳол бекор қилинади.