Германия реванш олди ва мундиалга чиқди

Шимолий Ирландия аллақачон иккинчи ўрин учун ҳам имкониятни йўқотганди ва сўнгги тур жамоалар учун қуруқ расмиятчиликка айланди. «Омадсизлар дербиси»да мезбонлар ғалабани қўлга киритди. Ўйиндаги ягона голни 44-дақиқада Жейми Донли пеналтидан урди. Шимолий Ирландия 1986 йилдан буён жаҳон чемпионатларидан қолиб кетмоқда. Аммо Миллатлар Лигасидаги яхши иштироки туфайли ушбу жамоада ҳам турнирга сараланиш учун сўнгги имкон бўлади – ўтиш ўйинлари орқали.

G гуруҳи

Нидерландлар ҳам ҳал қилди

Нидерландия – Литва 4:0
Голлар: Рейндерс, 16 (1:0). Гакпо, 58 – пеналти (2:0). Симонс, 60 (3:0). Мален, 62 (4:0)
Нидерландия: Вербрюгген, ван Дейк, де Лигт, Аке, Ю. Тимбер (Гертрейда, 64), Симонс (Валенте, 78), де Йонг (К. Тимбер, 63), Рейндерс, Гакпо (Ланг, 79), Мален, Депай (Эмега, 63)
Литва: Гертмонас, Тутышкинас, Уткус, Ширвис (Бенета, 46), Ласицкас (Упстас, 85), Армалас, Гинейтис, Сиргедас (Голубикас, 46), Воробев, Калинаускас (Бурба, 81), Черних (Паулаускас, 59)
Огоҳлантиришлар: Ширвис, 23. Паулаускас, 84

Ўтган турда поляклар билан ўйинда дуранг қайд этиб, муддатидан олдин йўлланмани ҳал қила олмагач, нидерландлар устози Роналд Куман танқидлар остида қолганди. Чунки назарий жиҳатдан, сўнгги турда жамоа биринчи ўринни бой бериши мумкин эди: бунинг учун жамоа Литвага йирик ҳисобда мағлуб бўлиши ва Полша ўз ўйинида йирик ҳисобда ғалаба қозониши талаб этиларди. Амалда эса нидерландлар сўнгги турда хотиржамлик билан вазифани ҳал қилди.

Тейани Рейндерс биринчи бўлимдаёқ ҳисобни очди. Иккинчи бўлимда эса Коди Гакпо, Хави Симонс ва Дониэлл Мален биттадан гол уриб, «Йохан Круифф Арена»га йиғилган мухлисларни хурсанд қилди. Айниқса, Симонснинг голи жуда чиройли чиқди: у рақиб ҳимоячисини икки бор алдаб ўтди ва олис бурчакни аниқ нишонга олди.

Малта – Полша 2:3
Голлар: Левандовски, 32 (0:1). Кардона, 36 (1:1). Вшолек, 59 (1:2). Теума, 68 – пеналти (2:2). Зелински,
85 (2:3)
Малта: Бонелло, Ментц (Бухагяр, 87), Шоу, Камензули, Мускат (Корбалан, 54), Гийоме, Сатариано, Теума (Пепе, 77), Шуареф, Д. Мбонг (Оверенд, 46), Кардона (П. Мбонг, 77)
Полша: Драговски, Висневски (Берешински, 77), Кендзера, Кивёр, Скурас, Вшолек (Капустка, 77), Зелински, Слиш (Гросицки, 77), Залевски (Свидерски, 46), Камински (Розга, 90+1), Левандовски
Огоҳлантиришлар: Теума, 45. Сатариано, 49 – Висневски, 5. Залевски, 17

Юқорида айтилганидек, Полшанинг ЖЧга тўғридан тўғри йўлланма қўлга киритиш имконияти фақат назарий жиҳатдан мавжуд эди. Малта билан учрашувнинг биринчи бўлимидан кейин эса жамоа ўтиш ўйинлари орқали йўлланмага эга бўлиш имконияти ҳам жуда пастлиги кўриниб қолди. Роберт Левандовски 32-дақиқада ҳисобни очган бўлса-да, малталиклар дарҳол жавоб голини уришди. Танаффусдан кейин жамоалар яна биттадан гол алмашишди: Павел Вшолекнинг аниқ зарбасига мезбонлар яримҳимоячиси Тедди Теум пеналтидан урилган гол билан жавоб қайтарди. 11 метрлик жарима зарбаси белгиланишидан олдин ноёб ҳолат кузатилди: поляклар учинчи голни уришганди, аммо бош ҳакам Игор Паяч VAR хонасидагилардан меҳмонларнинг голли ҳужуми бошланишидан олдин жарима майдонида фол ишлатилгани ҳақида хабар олди. Арбитр Карол Свидерскининг голини бекор қилди ва Малта учун пеналти белгилади.

Аммо полшаликлар барибир савия ҳисобига ғалабани илиб кетди. Ўйиннинг 85-дақиқасида Пётр Зелински меҳмонларга ғалаба келтирувчи голни урди – 3:2. Олдинда полякларни ўтиш ўйинлари кутмоқда, улар 2022 йилги мундиалга ҳам қўшимча саралаш орқали йўл олишганди.

L гуруҳи

Хорватча камбэк

Черногория – Хорватия 2:3
Голлар: Осмаич, 3 (1:0). Крстович, 17 (2:0). Перишич, 37 – пеналти (2:1). Якич, 72 (2:2). Влашич, 87 (2:3)
Черногория: Никич, Рубежич (Перович, 46), Туци, Марушич, Вешович (Шипчич, 77), Лончар (Вукотич, 62), Булатович (Брнович, 77), Осмаич, Янкович, Крстович, Йоветич (Аджич, 62)
Хорватия: Ливакович, Чалета-Цар (Станишич, 46), Шутало, Гвардиол (Понграчич, 46), Якич, Моро, Пашалич, Влашич, Перишич (Модрич, 78), Иванович (Крамарич, 55), Матанович (Муса, 59)
Огоҳлантиришлар: Лончар, 30. Рубежич, 36. Осмаич, 70 – Пашалич, 29

Бу гуруҳда сўнгги тур қуруқ расмиятчиликка айланди. Хорватлар аллақачон гуруҳда биринчи ўрин масаласини ҳал қилган, черногорияликлар эса сўнгги тур ўйинлари натижаларидан қатъи назар, учинчи ўриндан юқори кўтарила олмасди. Аммо, айтиш мумкинки, Черногорияда мотивация борасида муаммо йўқ эди. Биринчидан, Югославия бўйича собиқ қўшнига қарши ўйин доим алоҳида аҳамият касб этган. Иккинчидан, футболчилар кейинги цикл учун ўзини кўрсатиши керак эди.

Мезбонлар илк дақиқалардан ташаббусни қўлга олишди ва 17-дақиқагача икки гол уришди. 3-дақиқадаёқ Милутин Осмаич ҳисобни очди, кейин эса Никола Крстович чиройли ва аниқ зарба йўллади.

Аммо Хорватия ютқазишга ўрганмаган. Бўлим давомида «шашкачилар» Иван Перишичнинг пеналтидан урган голи орқали ҳисобни қисқартирди, танаффусда Златко Далич ҳимоя чизиғини янгилади ва иккинчи бўлимда бошқа гол ўтказилмади. Меҳмонлар тўлиқ куч билан ҳужумга ўтишди ва аввалига Якичнинг аниқ зарбаси билан ҳисобни тенглаштиришди. Модрич захирадан ўйинга қўшилганидан кейин эса Хорватия ғалабани илиб кетди. Никола Влашич қарши ҳужумни чиройли гол билан якунлади. Саккиз турда 22 очко – Хорватия ЖЧ-2026 саралашини мағлубиятсиз якунлади.

Чехия – Гибралтар 6:0
Голлар: Дудера, 5 (1:0). Хори, 18 (2:0). Цоуфал, 32 (3:0). Карабец, 39 (4:0). Соучек, 44 (5:0). Гранач, 51 (6:0)
Чехия: Коварж, Гранач, Зелени (Халоупек, 68), Юрасек, Цоуфал, Беран (Черв, 58), Соучек (Садилек, 68), Шик (Хитил, 88), Карабец, Дудера, Хори (Данек, 57)
Гибралтар: Хенкинс, Лопеш, Оливеро (Макклафферти, 46), Мауро, Жолли, Ториля (Перера, 85), Позо (Бент, 69), Ронан, Скэнлон, Дел Рио (Вайнет, 76), Бартоло (Морган, 85)
Огоҳлантириш: Ронан, 49

Чехлар ўтган турдаёқ жаҳон чемпионатига тўғридан тўғри йўлланмадан умид узиб бўлганди. Шунинг учун, Гибралтарга қарши ўйин Иван Гашек шогирдлари учун ярим ўртоқлик мақомидаги ўйинга айланди. Лекин Чехия барибир майдонга оптимал таркибда чиқиб келди ва Гибралтарни аяб ўтирмади. Мезбонлар жиддий қаршиликка учрамади ва ўз мухлислари кўз ўнгида Жейлен Хэнкинс дарвозасига олтита гол йўллашди. Чехия энди ўтиш ўйинлари учун қуръани кутмоқда.

Шу тариқа, ЖЧга йўл олган жамоалар сони 34 тага етди. Яна 14 та йўлланма қолди

1. АҚШ (мезбон)
2. Мексика (мезбон)
3. Канада (мезбон)
4. Япония
5. Янги Зеландия
6. Эрон
7. Аргентина
8. ЎЗБЕКИСТОН (дебют)
9. Жанубий Корея
10. Иордания (дебют)
11. Австралия
12. Бразилия
13. Эквадор
14. Уругвай
15. Колумбия
16. Парагвай
17. Марокаш 
18. Тунис 
19. Миср
20. Жазоир 
21. Гана 
22. Кабо-Верде (дебют)
23. Жанубий Африка Республикаси 
24. Қатар 
25. Англия 
26. Саудия Арабистони 
27. Кот-д'Ивуар 
28. Сенегал 
29. Франция 
30. Хорватия 
31. Португалия
32. Норвегия
33. Германия
34. Нидерландия