Тошкентда сувдан қарздор 46 мингга яқин абонент тармоқдан узилгани маълум қилинди

Аҳоли орасида тўлов интизомини шакллантириш, марказлашган тоза ичимлик суви таъминоти тармоқлари ва оқова сув хизматларидан ноқонуний фойдаланиш ҳолатларини олдини олиш, шунингдек, хизмат кўрсатиш тизимини янада яхшилаш мақсадида тегишли идоралар ва ҳамкор ташкилотлар билан биргаликда кенг кўламли ишлар амалга оширилмоқда.

Расмий маълумотларга кўра, жорий йилнинг январ–октябр ойларида назорат органлари билан ҳамкорликда ичимлик ва оқова сув тизимларига жами 4 351 та ноқонуний уланиш ҳолати аниқланган. Энг юқори кўрсаткичлар Тошкент шаҳри (488 та), Сирдарё вилояти (433 та), Қорақалпоғистон Республикаси (425 та) ва Хоразм вилоятида (419 та) қайд этилган.

Ушбу қонунбузарликлар туфайли дастлабки ҳисоб-китобларга кўра, жамият манфаатларига 82 млрд сўмдан ортиқ зарар етказилган. Шундан 33,6 млрд сўмлик зарарнинг қопланиши таъминланган.

Мавжуд қарздорликларни қисқартириш мақсадида жорий йил давомида 123,4 минг нафар қарздор истеъмолчи бўйича фуқаролик ва иқтисодий судларга 358,4 млрд сўмлик даъво аризалари киритилган. Ҳисобот даврида республика бўйича 62,4 минг нафар жисмоний ва юридик шахс сув таъминоти тармоғидан қарздорлиги сабаб узилган.

Шу жумладан, энг юқори кўрсаткич пойтахт ҳиссасига тўғри келмоқда — Тошкент шаҳрида сув бўйича қарзи мавжуд 46 мингга яқин абонент тармоқдан узилгани маълум қилинди.

Маълумотга кўра, кўрилган чоралар натижасида истеъмолчиларнинг дебитор қарздорлиги жорий йил бошига нисбатан 203 млрд сўмга ёки 22 фоизга қисқариб, 705,5 млрд сўмни ташкил этмоқда. Ўтган йилнинг мос даврига солиштирганда эса қарздорликлар 364 млрд сўмга, яъни 34 фоизга камайтирилган.