Фуқаролик ва иқтисодий низоларни кўриш тартиби соддалаштирилади

Олий Мажлис Қонунчилик палатасининг навбатдаги мажлисида фуқаролик ва иқтисодий суд ишларини соддалаштирилган тартибда кўриб чиқиш имкониятларини кенгайтиришга қаратилган қонун лойиҳаси биринчи ўқишда муҳокама қилинди.

Лойиҳа суд ишларини кўриб чиқиш муддатларини қисқартириш, фуқаролик ва иқтисодий низоларни тезроқ ҳал этиш орқали иқтисодий фаолият самарадорлигини оширишга хизмат қилиши кўзда тутилади.

Ҳужжат билан Фуқаролик процессуал ва Иқтисодий процессуал кодексларига даъво миқдорига боғлиқ ҳолда соддалаштирилган иш юритиш тартиби қўлланиладиган ишлар доирасини кенгайтиришга оид ўзгартишлар киритилмоқда.

Амалдаги қонунчиликка кўра, даъво баҳоси нисбатан кичик бўлган низолар:

• жисмоний шахсларга нисбатан — БҲМнинг 5 бараваригача;
• якка тартибдаги тадбиркорларга — БҲМнинг 10 бараваригача;
• юридик шахсларга — БҲМнинг 20 бараваригача бўлган ишлар соддалаштирилган тартибда кўриб чиқилмоқда.

Қонун лойиҳасига кўра эса соддалаштирилган тартибда кўриладиган ишлар бўйича даъвонинг максимал баҳоси қуйидагича белгиланмоқда:

фуқаролик низолари бўйича:

• юридик шахсларга нисбатан — БҲМнинг 150 бараваригача;
• якка тартибдаги тадбиркорларга — БҲМнинг 100 бараваригача;
• жисмоний шахсларга — БҲМнинг 50 бараваригача;

иқтисодий низолар бўйича:

• юридик шахсларга нисбатан — БҲМнинг 150 бараваригача;
• якка тартибдаги тадбиркорларга — БҲМнинг 100 бараваригача.

Ушбу ўзгаришлар натижасида кўплаб фуқаролик ва иқтисодий низолар судларда соддалаштирилган иш юритиш тартибида кўриб чиқилиши, суд қарорларининг эса одатдагидан тезроқ қонуний кучга кириши таъкидланди.

Мажлисда қайд этилганидек, қонун лойиҳасининг қабул қилиниши умумий тартибда кўрилаётган ишлар катта қисмини соддалаштирилган тартибга ўтказишга, суд қарорларининг кучга кириш муддатини 30 кундан 10 кунгача қисқартиришга хизмат қилади. Бу эса банклар балансларидаги ҳаракатсиз ва муаммоли активлар улушини камайтириш, иқтисодий низоларни тезкор ҳал этиш, суд тизимидаги юкламани қисқартириш ҳамда банклар ва тадбиркорлик субъектлари учун молиявий барқарорликни таъминлашга кўмаклашади.

Қонун лойиҳаси депутатлар томонидан иккинчи ўқишда қабул қилингани маълум қилинди.