Марказий банклар олтин йиғмоқда: жаҳонда энг йирик захиралар қаерда?

Олтин ҳали ҳам энг ишончли ва вақт синовидан ўтган активлардан бири бўлиб қолмоқда. Дунё бўйлаб марказий банклар унинг захираларини кўпайтиришда давом этмоқда, 2025 йилда эса олтинга бўлган юқори талаб металл нархини рекорд даражаларга олиб чиқди.

Фото: AP

Янги инфографика қайси давлатлар энг йирик расмий олтин захираларига эга эканини яққол кўрсатиб беради. Визуализация учун маълумотлар BullionVault платформаси томонидан тақдим қилинган бўлиб, 2024 йил ҳолатига кўра олтин ҳажмини тонналарида акс эттиради.

Катта фарқ билан АҚШ етакчилик қиляпти: мамлакат олтин захираси 8 133,5 тоннани ташкил этади ва ўн йилликлар давомида деярли ўзгармай келмоқда. Бу олтиннинг асосий қисми Форт-Ноксда ва Ню-Йоркдаги Федерал захира банкида сақланади.

Европанинг энг йирик иқтисодиётлари — Германия (3 352 тонна), Италия (2 452 тонна) ва Франция (2 437 тонна) жами 8 200 тонна олтинга эга, бу АҚШ захираларига деярли тенг. Бу улкан захиралар — бутун халқаро пул тизими асоси олтин бўлган, урушдан кейинги Бреттон-Вудс тизими меросидир.

Хитой олтин захирасини жадал оширмоқда: 2019 йилдаги 1 948 тоннадан 2024 йилга келиб 2 280 тоннагача. Бу Пекиннинг АҚШ ғазначилиги облигацияларига сармояларни қисқартириб, активларни диверсификация қилиш ва юаннинг жаҳон саҳнасидаги позицияларини мустаҳкамлаш стратегиясининг бир қисми ҳисобланади.

Россия 2 333 тонна олтин захирасига эга бўлиб, бешинчи ўринни эгаллайди.

Туркия (595 тонна) ва Полша (448 тонна) каби бошқа ривожланаётган бозорлар ҳам ўз захираларини кескин ошириб, олтиндан инфляция, валюта таваккалчиликлари ва геосиёсий беқарорликдан ҳимоя воситаси сифатида фойдаланмоқда.

Тайёрлаган: Отабек Матназаров

#олтин #Марказий банк