Ёнғин хавфсизлиги соҳасида айрим фаолият турлари лицензияланадиган фаолиятлар рўйхатига киритилди

Янги қонун (ЎРҚ–1099-сон, 27 ноябр 2025 йил) билан айрим қонун ҳужжатларига ўзгартириш ва қўшимчалар киритилди. Унга кўра, ёнғин хавфсизлиги билан боғлиқ қуйидаги фаолият турлари лицензияланадиган фаолият турлари рўйхатига киритилди:

• ёнғинни автоматик тарзда ўчириш ускуналарини монтаж қилиш, созлаш, таъмирлаш ҳамда уларга техник хизмат кўрсатиш фаолияти;
• ёнғин сигнализацияси қурилмаларини монтаж қилиш, созлаш, таъмирлаш ҳамда уларга техник хизмат кўрсатиш фаолияти.

Илгари ушбу фаолият турлари ёнғин хавфсизлиги соҳасида хабардор қилиш тартибида амалга оширилар эди. Эндиликда улар фақат тегишли лицензия мавжуд бўлган тақдирда бажарилиши мумкин бўлади.

Шунингдек, Қонунда Ўзбекистон норезиденти бўлган чет эл юридик шахслари учун лицензия ва рухсат этиш хусусиятига эга ҳужжатларни олиш тартиби ҳам белгилаб қўйилди. Унга кўра, бундай ҳужжатларни олиш учун ариза бериш ҳамда хабардор қилиш тартиб-таомиллари уларнинг Ўзбекистонда ҳисобга қўйилган доимий муассасаси орқали амалга оширилади.

Бироқ, бунда истисно ҳолат ҳам назарда тутилган. Яъни, ташқи иқтисодий фаолият ва транзит юкларни ташиш билан боғлиқ 1 марталик ҳаракатларни бажариш учун рухсат этиш хусусиятига эга ҳужжатларни расмийлаштиришда ушбу чет эл юридик шахсларининг Ўзбекистонда доимий муассаса сифатида ҳисобга қўйилиши талаб этилмайди.

Қонунда белгиланишича, ушбу ўзгартириш ва қўшимчалар қонун расмий эълон қилинган кундан 3 ой ўтгач кучга киради.