Оқ уй сайтида ОАВ учун “шармандалар зали” очилди

Оқ уй ўз сайтида "Медиажиноятчилар" (Media Offenders) номли саҳифани ишга туширди. У ерда, расмийларга кўра, АҚШ ҳокимияти фаолиятини бошқача талқин қилаётган инглиз тилидаги ОАВ ва уларнинг мақолаларига ҳаволалар жойлаштирилган. Wayback Machine онлайн-архиви маълумотларига кўра, лойиҳа шанба куни, 29 ноябрда пайдо бўлган.

"Медиа" бўлимида жойлаштирилган ушбу саҳифа бир неча қисмдан иборат. Юқори қисмида "Ёлғон маълумот беради. Ғаразли. Фош этилган" деган сарлавҳа қўйилиб, унинг остида "ҳафтанинг медиажиноятчилари" санаб ўтилади — The Boston Globe газетаси, CBS News телерадиокорпорациясининг янгиликлар бўлими, шунингдек, британия The Independent газетасининг Америка муҳарририяти.

Оқ уйнинг таъкидлашича, ушбу нашрлар "президент Трампнинг сўзларини ўзгача талқин қилиб, унинг қўзғолонга даъват қилган Конгресс аъзоларини жавобгарликка тортиш ҳақидаги чақириқларини гўёки уларни 'қатл этиш'га чақириқдек тасвирлаган".

Кейинги бўлим "Қоидабузар шармандалар зали" деб номланган бўлиб, унда Оқ уй маъмурияти "ОАВнинг ёлғон хабарлари рўйхатини" эълон қилган. Жадвал кўринишида келтирилган бу рўйхатда бир қатор инглиз тилидаги ОАВ, АҚШ ҳокимияти норозилигига сабаб бўлган мақолалар ва улар муаллифлари санаб ўтилади.

Масалан, CBS News'га қўйилган айбловлардан бирида нашр ўз мақоласи сарлавҳасида 27 марта қўлга олинган Кубадан келган "ноқонуний муҳожир"ни "Колорадо қарияси" деб атагани танқид қилинади. Politico газетасини эса Оқ уй "ғаразлик" ва "контекстни йўқотиш"да айблаган. Сабаби — мақоладаги манба Украинадаги урушни тўхтатиш режаси устида ишлаётган президентнинг махсус вакили Стивен Уиткоффни номақбул деб атагани.

Кейинги бўлим — "Етакчилар жадвали" ёки "Пастга қараб пойга" — "жиноятлар" сонига кўра етакчи 7 та ОАВни кўрсатувчи анимациядан иборат. Рўйхатнинг биринчи ўринида The Washington Post газетаси турибди, ундан кейин MSNBC телеканали, CBS News, CNN телеканали, шунингдек, The New York Times, Politico ва The Wall Street Journal газеталари келади.

Якуний бўлим — "такрорий жиноятчилар" диаграммаси. У "Етакчилар жадвали"нинг кенгайтирилган кўриниши бўлиб, унга яна бошқа ОАВ (масалан, Axios янгилик портали, Associated Press агентлиги ва Би-би-си корпорацияси) ҳам киритилган, шунингдек, ҳар бир нашр учун "қоидалар бузилиши" сони ва хусусияти ҳақидаги маълумотлар ҳам берилган. Масалан, сиёсат ва поп-маданият ҳақидаги The Daily Beast янгилик порталининг фақат битта "бузилиши" қайд этилган, аммо унга дарҳол уч айблов қўйилган — "ғаразлилик, сўл кайфиятдаги ақли расолик ва ёлғончилик".