Гўзал Оллоберганова Урганчда туғилган. Ёшлигида бир муддат Россиянинг Санкт-Петербург шаҳрида яшаган. Кейинроқ Ўзбекистонга қайтиб, Тошкент шаҳридаги Сингапур менежментни ривожлантириш институтида таълим олган. 2021 йилда эса талаба визаси билан АҚШга ўқишга келган. Kun.uz мухбири Америкага қилган сафари давомида Гўзал билан суҳбатлашиб, ундан “сеҳрли диёр”гача босиб ўтган йўли, ҳозирги фаолияти, икки мамлакат таълим тизимидаги фарқлар ҳақида сўради.
Гўзал Оллоберганова Тошкент шаҳридаги Сингапур менежментни ривожлантириш институтини тамомлаганидан кейин — 2021 йилда талабалик визаси билан АҚШга келган. У 4 йилдан бери шу давлатда ўқиб, ишлаб ҳамда яшаб келмоқда. Гўзал Америкада бухгалтерия йўналишида таълим олади. У АҚШдаги таълим Ўзбекистондан осонроқ эканини айтади.
“Ўзбекистонда чуқурроқ, кўпроқ маълумот беришади. Бу ерда эса сал енгилроқ. Озгина умумий маълумотни билиб қўйсангиз ҳам сиздан яхшиси йўқ. Ўзбекистонда қийинроқ, ҳақиқатан.
Бизда яхши маълумот беришади. Эсимда институтда менинг ўқитувчиларим жонини бериб ўқитишарди. Бизнесларнинг молиясини ҳисоблаб чиқардик. Қийин бўларди, лекин бажарардик.
Бу ерда эса шунчаки китоб беришади, “мана шу бўлимгача ўқиб қўйгин” дейишади. Америкада кўп институтларда McGraw Hill тизим ишлайди. У уйга вазифалар тизими ҳисобланади. Унга кирганингизда сиз жавобни белгилайсиз, уни текширсангиз бўлади. У сизга айтади: бу нотўғри, бошқасини текшир дейди, бошқасини босасиз. У тўғри дейди — бўлди, шуни киритиб кетаверасиз.
Аниқроғи, ўқидингиз-ўқимадингиз, тизим ичида ўзингиз текширасиз. Бўлди, шу билан беш баҳога топшириб кетаверасиз. Тизим жуда кечиримли”, – дейди у.
Гўзал ҳозирда логистика компанияларига хизмат кўрсатадиган UGL Holding компаниясида маркетинг менежери бўлиб ишлайди. У логистика соҳасига кириб келган вақтда соҳадан бехабар бўлган.
“Америкага келган вақтларимда бир дўстимиз компанияда суҳбатдан ўтишга таклиф қилган. Дугонам билан бирга бизнес эгаси билан суҳбатлашганмиз. “Мен логистика ҳақида ҳеч нимани билмайман, мендан ҳеч нарса кутманглар”, деб очиқ айтганман. Улар эса вақт ва имконият беришларини айтган. Бир йил ўз устимда ишлаганман, онлайн курслар ўқиганман, айтганимдек, логистикада нима бўлаётганини, у ўзи нима, қаердан кириб келган – шуларни тушунганман. Ўзимга логистика ёқади. Боиси одамлар билан гаплашиб, коммуникацияга киришишни яхши кўраман. Логистикада ҳам ҳар доим ҳайдовчилар, бошқа департаментлар билан гаплашиб турасиз. Бир жойда ўтириб қиладиган иш эмас-да, ҳар доим ҳаракатда бўлишингиз керак”,
