АҚШ «Лукойл»га жорий этилган айрим санкцияларни вақтинча бекор қилди

АҚШ Молия вазирлиги санкциялар рўйхатига киритилган «Лукойл» компаниясининг Россиядан ташқарида жойлашган автомобилларга ёнилғи қуйиш шохобчаларига фаолиятни давом эттиришга рухсат берадиган умумий лицензия берди. Шу тариқа, АҚШ идораси пайшанба куни, 4 декабрда, Россия нефт концернига нисбатан қўлланган айрим санкциялар амал қилишини тўхтатди.

Баёнотга кўра, Россиядан ташқаридаги «Лукойл» АЁҚШ билан боғлиқ транзакциялар 2026 йил 29 апрел куни АҚШнинг шарқий вақти бўйича соат 00:01 гача (Тошкент вақти билан 09:01 гача) рухсат этилган. Вашингтонда тушунтирилганидек, бундай чоралар «чакана ёнилғи қуйиш шохобчалари билан одатий операцияларни амалга оширишга интилаётган истеъмолчилар ва таъминотчиларга етказиладиган зарарни юмшатиш» учун қабул қилинган.

Бу қарор амалда АҚШда ва бошқа давлатларда «Лукойл» бренди остида ишлаётган АЁҚШ фаолиятини давом эттириш имконини беради, бир вақтнинг ўзида эса маблағларнинг Россияга чиқиб кетишининг олдини олишга қаратилган. Россия 2022 йил февралда Украинага қарши тўлиқ миқёсдаги ҳужум бошлаганидан бери АҚШ ва ЕИнинг кенг қамровли санкциялари остида турибди. Шу билан бирга, мазкур қарор президент Доналд Трамп томонидан октябр ойида жорий этилган айрим чораларини қисман тўхтатиб туради.

Бундай қадам ҳақида декабр бошида хабар берилган эди — ўшанда Оқ уй вакиллари Москвада Россия президенти Владимир Путин билан учрашиб, Украинадаги урушни тугатиш шартлари бўйича эҳтимолий муросани келишишга уринганди.

Россиянинг «Лукойл» ва «Роснефть» нефт компаниялари, шунингдек уларнинг 34 та шуъба корхонаси Украинага қарши уруш давом этаётган бир пайтда, жорий йил октябр ойида АҚШ ва Буюк Британия санкциялари остига тушди. AFP агентлиги таъкидлашича, бу Трамп маъмурияти томонидан РФга нисбатан жорий этилган энг кескин чоралардан бири бўлган.