Жаред Кушнер номи Россиянинг Украинага қарши уруши контекстида омма олдида кутилмаганда 19 ноябр куни пайдо бўлди. Америка ОАВ у Россия вакили Кирилл Дмитриев билан учрашувдан сўнг “28 банддан иборат махфий тинчлик режаси”ни ишлаб чиқишда гўёки иштирок этгани ҳақида хабар берди.
23 ноябр куни эса америкалик бизнесмен ва АҚШ президенти Доналд Трампнинг куёви Жаред Кушнер Женевада АҚШ, Украина ва Европанинг бир қатор давлатлари ўртасидаги музокаралар даврасида расман музокара столида ўтирди, у ерда АҚШнинг тинчлик таклифлари муҳокама қилинган эди. Орадан бир неча кун ўтгач, Кушнер Майамида Украина делегацияси билан бўлиб ўтган музокараларда иштирок этди, шундан сўнг эса Стив Уиткофф билан бирга қайта ишланган режани муҳокама қилиш мақсадида Москвага, Россия президенти Владимир Путин билан учрашувга жўнаб кетди. У ердан эса яна Украина томонидан бош музокарачи бўлган Рустем Умеров билан учрашиш учун Флоридага қайтди.
Шу тариқа бир неча кун ичида Жаред Кушнер Қўшма Штатларнинг Россия ва Украина ўртасида тинчлик келишуви тузиш борасидаги асосий музокарачиларидан бирига айланди. У нега музокара жараёнига қўшилди ва Украина ундан нима кутиши мумкин?
“Женевада бўлгани каби, мен Жаред Кушнернинг ёндашувини ва у ўз қарашини қандай ифода этаётганини қадрлайман”, — деб ёзди у ҳақда Майамидаги учрашувдан сўнг Х ижтимоий тармоғида Украина ташқи ишлар вазири биринчи ўринбосари Сергей Кислица. Украина расмийлари томонидан Трампнинг куёвининг музокара жараёнида тутган ўрни ҳақида бошқа расмий изоҳлар бўлгани йўқ.
DW’га музокаралар бориши ҳақида хабардор манбанинг маълум қилишича, Кушнер бошиданоқ АҚШнинг тинчлик таклифларини муҳокама қилиш жараёнига жуда фаол киришган ва муҳокама қилинаётган барча масалалар бўйича профессионаллик ҳамда яхши хабардорликни намойиш этган.
“Бироз кутилмаган ҳол бўлди: бундай даражадаги инсон ноутбукни чиқариб, муҳокама қилинганларни – бандма-банд, барча таклифлар ва ифода вариантларини – жуда батафсил ҳолда мустақил равишда ҳужжатга ёза бошлади. Одатда бундай техник ишни бошқалар бажаради, у эса ўз қўли билан қилаётган эди. У режанинг ҳар бир банди мантиғини ўрганар, нимани муҳокама қилаётганларини тушуниб олишга ҳаракат қилар, мулоқот ва тузатишлар учун очиқ эди”, — деди музокаралар боришидан хабардор, DW билан махфийлик шартида гаплашган манба.
Бироқ Кушнернинг асосий тажрибаси барибир бизнес соҳасига тааллуқли, шу боис “унинг делегация таркибига киритилиши музокараларнинг устувор йўналишини иқтисодий таркибий қисм ва натижага жуда кучли равишда боғлаб қўяди”, дея қўшимча қилди манба.
