Келлог: Тинчлик келишувини имзолашга иккита банд тўсқинлик қилмоқда

Украинадаги урушни тўхтатиш бўйича келишувни имзолаш “ростдан ҳам жуда яқин”, унинг тақдири эса икки асосий масалани ҳал этишга — Донбасснинг келажаги ва Запорижжя атом электр станцияси (ЗАЭС)га — боғлиқ. Бу ҳақда шанба, 6 декабр куни, Калифорния штатида Роналд Рейган номи билан аталган президентлик фонди томонидан ташкил этилган форумда АҚШ президенти Доналд Трампнинг Украина бўйича махсус вакили Кит Келлог маълум қилди.

“Агар шу икки масалани тартибга сола олсак, қолган ҳамма нарса жуда енгил ҳал бўлади, деб ўйлайман”, — деди Келлог Калифорниядаги (Сими-Вэлли шаҳри) Роналд Рейган Президентлик кутубхонаси ва музейида нутқ сўзлар экан. “Биз деярли мақсадга етдик… Ростдан ҳам жуда яқин турибмиз”, — дея ишонтирди Трампнинг махсус вакили.

Унинг айтишича, музокаралар жараёни “финиш чизиғигача қолган сўнгги 10 метр” босқичида, бу эса одатда энг қийин босқич ҳисобланади.

Келлогнинг аниқлашича, тўлиқ кўламли уруш бошланганидан бери Россия ва Украина томонида ҳалок бўлган ва яраланганлар сони жами 2 миллион нафардан ошган.

Reuters агентлиги эслатганидек, Россия ҳозирги вақтда Украина ҳудудининг 19,2 фоизини назорат қилмоқда. Бунга Қрим, Луханск вилоятининг бутун ҳудуди, Донецк вилоятининг 80 фоизидан ортиқ қисми, Херсон ва Запорижжя вилоятларининг тахминан 75 фоизи, шунингдек, Харкив, Суми, Миколайив ва Днипропетровск вилоятларининг айрим ҳудудлари киради.

АҚШнинг дастлабки таклифларига кўра, ЗАЭСда иш қайта тикланиши, станция эса Атом энергияси халқаро агентлиги (АЭХА) назорати остида бўлиши керак. Станцияда ишлаб чиқариладиган электр энергияси эса Россия ва Украина ўртасида тақсимланиши назарда тутилган.

Украина президенти Володимир Зеленский 6 декабр куни, АҚШ президентининг махсус элчиси Стивен Уиткофф ва Трампнинг куёви Жаред Кушнер билан узоқ ва “мазмунли” телефон суҳбати бўлиб ўтганини маълум қилди.

Кремлда 5 декабрь куни Кушнер келишувни тайёрлаш бўйича асосий ишни олиб бориши мумкинлиги айтилди. “Агар қандайдир режа қоғозда янада ишлаб чиқилаверса ва у келишувга олиб борса, унда қаламни асосан Кушнернинг ўзи ушлашига тўғри келади”, — деди Россия президенти ёрдамчиси Юрий Ушаков.

Франция президенти Эммануэл Макрон 8 декабр куни Лондонда Украина раҳбари Володимир Зеленский, Буюк Британия бош вазири Кир Стармер ва Германия канцлери Фридрих Мерц билан учрашади. Учрашув мақсади — АҚШ раҳбарлигида олиб борилаётган музокараларда эришилган илгарилашларни “танқидий баҳолаш”. Макрон 6 декабр куни X ижтимоий тармоғида Лондон учрашуви ҳақида эълон қилди.