Донецкда АҚШ фуқаросининг ўлдирилиши иши бўйича суд ҳукми чиқарилди

Россия армиясининг тўрт ҳарбий хизматчиси Украина шарқида РФ томонида жанг қилган, «ҳарбий мухбир» ва пропагандист Рассел Бентлини ўлдиришда айбланиб, 12 йилгача озодликдан маҳрум этилди.

Фото: Жанубий ҳарбий округ

Оккупация қилинган Донецк шаҳридаги гарнизон ҳарбий суди Украина шарқида Россия томонида жанг қилган ва Sputnik агентлиги ходими бўлган АҚШ фуқароси Рассел Бентлини ўлдириш иши бўйича тўрт россиялик ҳарбийга ҳукм эълон қилди. Бу ҳақда душанба, 8 декабр куни Жанубий ҳарбий округ суди матбуот хизмати хабар берди.

Россия армияси майори Виталий Вансяцкий ва катта лейтенант Андрей Иорданов қаттиқ тартибли колонияда 12 йилга, кичик сержант Владислав Агалцев 11 йилга озодликдан маҳрум этилди, Владимир Бажин эса 1,5 йилга колонияга ҳукм қилинди.

Вансяцкий, Иорданов ва Агалцев жабрланувчининг эҳтиётсизлик ортидан ўлимига олиб келган қийноқлар билан бирга хизмат ваколатларини суиистеъмол қилишда айбдор деб топилди. Иордановга қўшимча равишда ҳибсдан қочиш айби ҳам юкланди. Ҳарбийларнинг барчаси унвонларидан маҳрум этилди. Бажин жиноятни яширишда айбланди.

Рассел Бентли — АҚШнинг Техас штатида туғилган. У 2014 йилдан бери Украина шарқидаги урушда иштирок этган, кейинчалик эса Россиянинг Sputnik медиа-лойиҳаси «ҳарбий мухбири» сифатида ишлаган. Донецкда у маҳаллий қизнинг турмуш ўртоғига айланган, Россия фуқаролигини олган. 2024 йил апрелида «Россия сегодня» медиагуруҳи ва RT телеканали бош муҳаррири Маргарита Симонян 64 ёшли Бентли Донецкда ҳалок бўлганини маълум қилган эди.

Тергов версиясига кўра, 2024 йил 8 апрел куни Вансяцкий ва Иорданов Бентлини «ракет зарбаси оқибатларини видеога олишга тайёргарлик кўраётган пайтида» кўриб қолган. Улар ундан ҳужжатларини кўрсатишни ва бу ерда бўлиш сабабини тушунтиришни талаб қилган. Америкалик ўзини мухбир сифатида таништирганидан сўнг, Вансяцкий «ҳарбий қисм қўмондонлигига диверсант аниқлангани ҳақида» хабар берган.

Бентлини қисмга олиб бориш ҳақида буйруқ олгач, Вансяцкий америкаликни ушлашни Иордановга топширган. Бентлини машинага ўтқизишган, бошига қоп кийгизишган. Вансяцкий, Иорданов ва Агалцев Бентли «диверсион-разведка гуруҳларига алоқадорлигини тан олишини» талаб қилиш мақсадида уни калтаклаб, қийнаган, натижада у ҳалок бўлган. Унинг ўлими изини йўқотиш учун Вансяцкий ва Агалцев жасадни автомобил багажнигига солиб, машинани портлатган. Кейинги куни Бажин ва Иорданов портлаш жойига қайтиб келиб, қолган қолдиқларни ёқиб юборган.

Бентлини ўлдириш иши бўйича суд жараёни 2024 йил декабрида Донецк гарнизон ҳарбий судида бошланган. Эшитувлар ёпиқ режимда ўтказилган. Давлат айблови айбланувчилар учун 1,5 йилдан 15 йилгача озодликдан маҳрум этиш жазосини сўраган.

Тайёрлаган: Отабек Матназаров

#АҚШ #Донецк